Ижтимоий тармоқлар ҳаётимизнинг асосий бўлагига айлангани сари ундан даромад олишга қизиқувчилар сони ортмоқда. Афсуски, кўпроқ обуначи йиғиш ва фойдаланувчилар эътиборига тушиш учун кўнгли тусаган йўналишда видео ишлаётганлар ҳам йўқ эмас. “Дарё” масалага чуқурроқ ёндашиб, ижтимоий тармоқлардаги идеал ҳаёт иллюзияси ҳақида кўрсатув тайёрлади.
Instagram’да кўпчилик сохта бахтини кўз-кўз қилиб, ўзида йўқ нарсани бордек қилиб кўрсатиш билан оворадек туюлади. Афсуски, блогерлар кўрсатаётган сохта бахтли ҳаёт сабаб ёшларимиз орасида улар бой, мен ҳам шу ишни қилишим керак, деган фикр пайдо бўлди. Улар очиқчасига “Блогерлик қилсам, тез бой бўлиб кетаман”, деб орзу қилишяпти. Ишонч билан айтиш керакки, аслида блогерлик касб эмас. Агар интернет ўчиб қолса, бу фаолият тури ўша куни тўхтайди. Инсон олдига аниқ мақсадни қўйиб, касб ёки ҳунарни ўрганиши керак. Афсуски, айрим ёшларимиз тиктокерларга қизиқиб, ҳаё-ибони унутиб қўйишяпти. Қўпол қилиб айтганда, миллий маънавиятимизга тупуриб, кўнгиллари тусаган ишни қилишяпти, дейди психолог Шоира Исоқова.
Эксперт Саидаброр Умаров айрим чала мотиватор ва психологлар оилаларнинг ажралишига сабаб бўлаётгани ҳақида гапирди.
Чала мотиватор ва психологлар орасида ўз шахсий ҳаёти мисолида одамларга йўл-йўриқ кўрсатишга уриниш ҳолатлари кўпайиб келди. Шахсий ҳаёт ўз номи билан шахсий, уни оммага мослаштириб бўлмайди. “Мана мен биринчи эримдан ажрашганимда бундай қилган эдим, кейин иккинчи марта оила қурдим”, дея аёлларга ақл ўргатадиганлар кўпайиб кетди. Тўғри, қайта оила қуриш айб эмас, қонуний ва шаръий никоҳи бўлса, бемалол яшайверсин. Аммо бир оиласини сақлолмаган, муқим бахтли ҳаёт кечиролмаган инсоннинг бошқаларга бу борада маслаҳат беришида бирор мантиқ йўқ. Бу худди камбағал одамнинг сени бой қиламан, дейишига ўхшайди, дейди Саидаброр Умаров.
Кўрсатув давомида Instagram’даги баъзи блогерлар тарғиб қилаётган ғоялар сабаб оилалар тинчлиги бузилаётгани ҳақида ҳам фикрлар билдирилди. Бундан ташқари, кўрилишлар сонининг ортиши учун ибо-ҳаёни бир четга сураётган ва оиласидаги вазиятни оммага олиб чиқаётганлар ҳам танқид қилинди.
Видеони тўлиқ ҳолда томоша қилинг.
Изоҳ (0)