ОАВни қўллаб-қувватлаш бўйича янги фонд қошида жамоатчилик кенгаши тузилмоқда
Журналистика ва блогерлик фаолиятини ривожлантириш, уларни моддий жиҳатдан қўллаб-қувватлаш ҳамда ҳуқуқларини рўёбга чиқаришга кўмаклашиш мақсадида Ўзбекистонда Миллий масс-медиани қўллаб-қувватлаш ва ривожлантириш жамоат фонди иш бошлагани ҳақида хабар берилган эди.
Жамоат фонди томонидан маълум қилинишича, жамоат фондини таъсис этиш бўйича бир гуруҳ журналист ва блогерлар, ОАВ соҳаси вакиллари ташаббускор гуруҳ сифатида ариза берган. Жумладан, улар орасида Муҳрим Аъзамхўжаев, Қобил Хидиров, Лазиз Ҳамидов, Хушнуд Худойбердиев, Бобур Абидов, Мадина Нурманова, Аброр Исмоилов ва бошқалар бўлган.
Жамоат фонди қошида оммавий ахборот воситалари вакиллари ҳамда блогерлардан таркиб топган жамоатчилик кенгаши тузилиши кўзда тутилган. Хусусан, медиа соҳасининг қуйидаги вакиллари жамоатчилик кенгаши аъзолигига таклиф этилмоқда:
- Азамат Отажонов («Gazeta.uz»);
- Умид Шермуҳаммедов («Kun.uz»);
- Муҳрим Аъзамхўжаев («Daryo.uz»);
- Хуршид Далиев («Human.uz»);
- Қамариддин Шайхов («Qalampir.uz»);
- Абдуғани Абдураҳмонов («Xabar.uz»);
- Навбаҳор Имомова (Америка овози);
- Қобил Хидиров (блогер);
- Нозим Сафаров (блогер);
- Али Қаҳҳоров (блогер);
- Лазиз Ҳамидов (влогер).
Кенгаш таркиби тасдиқлангандан сўнг, улар томонидан масс-медиа соҳасини янада ривожлантириш юзасидан тавсиялар ишлаб чиқилади. Кенгаш журналист ва блогерларнинг эркин ахборот олиш ва тарқатишга оид фаолияти давомида дуч келган муаммоларини доимий равишда муҳокама қилиб боради ва уларнинг ечимини топиш, ахборот маконида нодавлат секторнинг ролини кучайтиришга кўмаклашиш, юзага келган зиддиятли масалаларни ҳал қилишда медиация институтини қўллаш чораларини кўради.
Шу билан бирга, ОАВ соҳасига хорижий ва маҳаллий грантлар ва маблағлар жалб қилинади.
Жамоат фонди журналист ва блогерлар, шунингдек матбуот котибларининг малакасини ошириб бориш мақсадида доимий равишда ўқув семинарлари ташкил этиб боради. Шунингдек, фонд сўз эркинлиги ва ахборот маконига оид қонунчиликни такомиллаштириш бўйича фаол жамоатчилик позицияси юзасидан мунтазам таклифлар ишлаб чиқади.
