Бундестаг иккинчи уринишда кўпчилик овоз билан христиан демократлар етакчиси Фридрих Мерцни Германия канцлери этиб сайлади. Унга ғалаба қозониш учун зарур бўлган 316 та мутлақ кўпчилик овоздан 325 нафар депутат овоз берди. Унинг тайинланишига 289 нафар парламент аъзоси қарши чиқди. Бу ҳақда DW хабар бермоқда.
Энди Мерц ва унинг кабинети аъзолари федерал президент Франк-Валтер Штайнмаердан лавозимга тайинлаш тўғрисидаги ёрлиқни олишлари керак. Шундан сўнг, Христиан-демократик иттифоқ ва Христиан-ижтимоий иттифоқ (ХДИ/ХСИ) консерватив блокининг муддатидан олдинги сайловлардаги ғалабасидан кейин бошланган ҳокимиятга ўтиш жараёни узил-кесил якунланади.
6 май куни бўлиб ўтган овоз беришнинг биринчи босқичида сиёсатчи муваффақиятсизликка учради. Унга олтита овоз етишмади. Шундай қилиб, ГФР тарихида биринчи марта ҳукумат раҳбари лавозимига асосий номзод муваффақиятли коалиция музокараларидан сўнг биринчи уринишдаёқ парламентнинг қўллаб-қувватлашини қўлга кирита олмади. Иккинчи овоз беришни “Яшиллар” ва “Сўллар” фракциялари билан келишилган ҳолда ўша куннинг ўзида ўтказишга қарор қилинди. Шу билан бирга, ГФР Асосий қонунига кўра, Бундестаг 14 кун ичида бошқа номзодни ҳам илгари суриши ва уни канцлер этиб сайлаши мумкин эди.
Эътиборли жиҳати шундаки, ҳукмрон коалиция тузишга келишиб олган ХДИ/ХСИ консерватив блоки ва социал-демократлар (СДП) биргаликда Бундестагда 328 та мандатга эга. Бу эса биринчи турда Мерцга унинг ўз иттифоқчилари овоз бермаганлигини кўрсатади.
Германия президенти Франк-Валтер Штайнмаер сайловдан сўнг Белвю саройида ўтказилган маросимда Фридрих Мерцга канцлерлик лавозимига тайинланганлиги ҳақидаги расмий ёрлиқни топширди.
Германияда муддатидан олдин парламент сайловлари 23 февраль куни бўлиб ўтди. Унда биринчи ўринни Мерцнинг “Христиан-демократик иттифоқи” ва “Христиан-социал иттифоқи” (ХДИ/ХСИ, “Иттифоқ”) блоки эгаллади. Бўлажак канцлер коалицион ҳукумат тузиши керак.
Изоҳ (0)