Германияда Фридрих Мерз бошчилигидаги ХДИ/ХСИ консерватив блоки Бундестагга муддатидан олдин бўлиб ўтган сайловларда 28,5 фоиз овоз билан ғалаба қозонди. Бу ҳақда Федерал сайлов комиссиясига таяниб, Deutsche Welle хабар берди.
“Германия учун муқобил” (АфД) номли ўта ўнг партия 20,8 фоиз овоз билан иккинчи ўринни эгаллади, сўл марказчи Германия Социал-демократик партияси (ГСДП) эса 16,4 фоиз билан учинчи ўринга чиқди. Тўртинчи ўринда “Иттифоқ 90”/“Яшиллар” партиясидан сўл либераллар (11,6 фоиз), бешинчи ўринда эса Сўл партия (8,8 фоиз) жойлашди.
Либерал Эркин демократик партия (ЭДП) ва сўл-популистик Сара Вагенкнехт иттифоқи (ССВ) бундестагга кира олмади. Сайлов комиссияси маълумотларига кўра, биринчиси атиги 4,3 фоиз, иккинчиси эса 4,972 фоиз овоз тўплади, парламентга ўтиш учун зарур бўлган 5 фоизлик чегарага ета олмади.
Олаф Шольц муносабати
Германиянинг амалдаги канцлери Олаф Шольц 23 февраль куни Фридрих Мерз ва ХДИ/ХСИ блоки билан коалиция тузиш бўйича шахсан музокаралар олиб бормаслигини ва янги ҳукумат таркибига кирмаслигини маълум қилди.
У ўз партияси ГСДПнинг сайловлардаги мағлубиятини тан олиб, натижани “аччиқ” деб баҳолади ва бунинг учун масъулиятни ўз зиммасига олди. Бироқ, у ўз истеъфоси ҳақида сўз очмади. У ХДИ/ХСИ номзоди Фридрих Мерсни ғалаба ва янги ҳукуматни шакллантириш ваколати билан табриклади.
Шольц, шунингдек, АфДнинг юқори натижаси (тахминан 20%) уни жиддий хавотирга солаётганини таъкидлади.
Бу мамлакатда АфД каби ўта ўнг партиянинг бундай натижаларга эришиши биз ҳеч қачон кўника олмайдиган ҳодисадир, деди канцлер.
Фридрих Мерс эса Германиянинг янги ҳукуматини 2025 йил 21 апрель — Пасха байрамига қадар тузишга ваъда берди. Сиёсатчи унга ким кириши мумкинлиги ҳақида гапиришдан бош тортди, бироқ унинг партияси АфД билан биргаликда мамлакатни бошқармаслигини таъкидлади.
Изоҳ (0)