Туркия президенти Ражаб Тоййиб Эрдўғон БМТ Бош ассамблеясида Яқин Шарқдаги вазият ҳақида кескин гапирди. Бу ҳақда Anadolu хабар берди.
Эрдўғон Исроил бош вазирини танқид қилиб, уни Адольф Гитлерга қиёслади.
“Халқаро ҳамжамият фаластинлик тинч аҳолини Исроил ҳаракатларидан ҳимоя қилиш механизмини ишлаб чиқиши керак. Гитлер 70 йил аввал инсоният иттифоқи томонидан тўхтатилганидек, Нетаньяху ва унинг қотил тармоғи ҳам ‘инсоният иттифоқи’ билан тўхтатилиши керак”, деди у.
Сиёсатчи БМТга аъзо ва буни ҳали амалга оширмаган барча давлатларни Фаластин давлатини зудлик билан тан олишга чақирди.
“Умид қиламанки, бу тарихий қадам Фаластиннинг БМТга тўлақонли аъзо бўлиши йўлидаги сўнгги бурилиш нуқтаси бўлади. БМТда Фаластинни тан олмаган давлатлар ҳали ҳам бор. Мен уларни ушбу муҳим даврда тарихнинг тўғри томонини эгаллаш орқали Фаластин давлатини тезроқ тан олишга чақираман”, деди Туркия раҳбари.
Эрдоғон БМТнинг миллионлаб одамлар ҳалок бўлган Иккинчи жаҳон урушидан сўнг халқаро тинчлик ва хавфсизликни ҳимоя қилиш мақсадида ташкил этилганини эслатиб ўтди.
“Афсуски, сўнгги йилларда БМТнинг ўз асосий вазифасини бажаришда ожизлик кўрсатаётганини, тобора самара бермайдиган, қолоқ ва ҳаракатсиз тузилмага айланиб бораётганини кузатмоқдамиз”, деди у.
Нутқ давомида сиёсатчи яҳудийлар ва мусулмонларга қарши камситишнинг ҳар қандай кўринишига йўл қўйиб бўлмаслигини таъкидлади. У 2024 йил 15 мартдаги қарор лойиҳасига мувофиқ БМТда исломофобияга қарши кураш бўйича махсус вакил тайинланишини тезлаштиришга чақирди.
Эрдўғоннинг Нетаньяхуга қарши баёнотлари
Таъкидлаш керакки, бу Туркия президентининг Нетаньяхуга нисбатан илк танқиди эмас. Март ойида Эрдўғон Ғазодаги вазият ҳақида гапириб, Яқин Шарқда бўлаётган воқеаларни геноцид деб атаганди. 2023 йил декабрь ойида Туркия президенти Нетаньяхуни Гитлер билан қиёслаган, Исроил бош вазири эса бунга жавоб қайтарган.
“Курдларга қарши геноцид ўтказаётган, ўз ҳокимиятига қарши чиқувчи журналистларни қамоққа ташлаш бўйича жаҳон рекордини ўрнатган Эрдўғон бизга ахлоқ дарси беришга ҳақли охирги одамдир”, деган Нетаньяху.
Бунгача Туркия президенти БМТни муомалага лаёқатсиз ташкилот деб атаган ва унинг тузилмасини ўзгартиришга чақирган эди. 2023 йилнинг кузида Ғазодаги воқеалар туфайли Туркия Исроилдаги элчисини чақириб олди. Жорий йил июль ойи охирида президент Ражаб Тоййиб Эрдўғон Туркия бир пайтлар Тоғли Қорабоғ ва Ливияга қандай кирган бўлса, Исроилга ҳам шундай кириши мумкинлигини айтган эди.
Изоҳ (0)