Ўзбекистонда турагентлик фаолиятини амалга ошириш учун лицензия олиш тартиби бекор қилиниб, унинг ўрнига турагентлик фаолиятини бошлаганлик ёки тугатганлик ҳақида хабарнома юбориш тартиби жорий этилади.
Қонунчилик палатасининг 29 апрелдаги мажлисида Адлия вазирлиги томонидан ишлаб чиқилган “Лицензиялаш, рухсат бериш ва хабардор қилиш тартиб-таомиллари янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун лойиҳаси учинчи ўқишда қабул қилинди ва Сенатга юборилди.
Қонун лойиҳаси билан тадбиркорлик субектларининг 12 турдаги лицензия, рухсат бериш ва хабарнома олиш талаби бекор бўлиши, лицензиялаш, рухсат бериш ва хабардор қилиш тартиб-таомилларидан ўтиш бўйича аризаларни Давлат хизматлари марказлари орқали ҳам тақдим этиш имкониятини яратиш белгиланмоқда.
Давлат хизматлари агентлиги хабар қилишича, 3 турдаги лицензия, жумладан, турагентлик фаолиятини амалга ошириш учун лицензия хабарнома шаклига ўтказилмоқда.
Депутатларнинг айтишича, қонун лойиҳасининг қабул қилиниши лицензиялаш, рухсат бериш ва хабардор қилиш тартиб-таомилларини янада соддалаштиришга, тадбиркорлик субъектларини ҳар томонлама қўллаб-қувватлаш, бозорда тенг шароитлар ва рақобат муҳитини таъминлашга хизмат қилади.
Амалдаги тартиб
Ўзбекистонда турагентлик туризм фаолияти учун лицензия олиниши керак. Лицензия олиш учун талабгор Давлат хизматлари марказлари ёки ЯИДXП орқали ёки ўзи келиб, лицензияловчи органга ариза ва зарур ҳужжатларни тақдим этади. Ариза кўриб чиқилиши учун лицензия талабгори БҲМнинг 2,5 баравари миқдорида йиғим тўлайди.
Лицензия бериш ёки лицензия беришни рад этиш тўғрисидаги қарор лицензияловчи орган томонидан барча зарур ҳужжатлар билан ариза олинган кундан бошлаб 10 иш кунидан ошмайдиган муддатда лицензияловчи орган раҳбарининг ўринбосари томонидан тасдиқланган эксперт хулосаси асосида қабул қилинади.
Изоҳ (0)