Кино оламининг энг севимли анимацион франшизаларидан бири — “Ўйинчоқлар тарихи” 2026 йилда ўзининг бешинчи қисми билан томошабинларга қайтади. Pixar ва Disney студиялари навбатдаги фильм орқали замонавий болалар билан боғлиқ муаммоларни ёритишга ваъда бермоқда.
Расмий маълумотларга кўра, беш йиллик танаффусдан сўнг “Ўйинчоқлар тарихи 5” мультфильми 2026 йил 19 июнь куни экранларга чиқади. Ушбу янгиликни 2023 йил февраль ойида Disney компаниясининг бош директори Боб Айгер тасдиқлаган.
Базз Лайтер қаҳрамонига овоз берган актёр Тим Аллен WIVB телеканалига берган интервьюсида “Ўйинчоқлар тарихи 5”нинг баъзи тафсилотларини ошкор қилди.
Актёрнинг сўзларига кўра, мультфильм Базз иштирокидаги ақл бовар қилмас саҳна билан бошланади. Сюжет ривожи эса ковбой қиз Жесси билан чамбарчас боғлиқ бўлади. Жессига овоз берган актриса — Жоан Кюсак сўзларига кўра, мультфильм воқеалари асосан ковбой қиз билан боғлиқ.
Фильмнинг асосий ғояси технологиялар ва замонавий болалик ўртасидаги зиддиятга урғу беришдир. Эндиликда болалар кўпроқ гаджетларга берилиб кетгани сабабли, ўйинчоқлар ўзларини унутилгандай ҳис қилади ва улар яна ўз эгаларининг эътиборини қайта қозонишга ҳаракат қилишади.
Франшизанинг аввалги қисмлари режиссёри ва сценарий муаллифи, “Немони излаб” мультфильми учун “Оскар” мукофотини олган Эндрю Стентон навбатдаги фильмга ҳам режиссёрлик қилади.
Изоҳ (0)