АҚШ президенти Дональд Трамп Эрон томонидан қўллаб-қувватланаётган Яман ҳусийларини “хорижий террорчи ташкилот” сифатида белгиловчи фармонни имзолади.
Собиқ президент Жо Байден 2021 йилда Трамп ўрнига келгач, унинг ўз муддати якунида киритган ушбу таърифни бекор қилган эди.
Байденнинг бу қарори инсонпарварлик ташкилотларининг ташвиши туфайли қабул қилинган. Улар амалда катта ҳудудларни, жумладан пойтахт Санони назорат қилаётган ҳусийлар билан мулоқот қилишга мажбур бўлганлари сабабли, Яманни тарк этишларига тўғри келишини билдирган.
Бироқ 2023 йил 7 октябрда Ғазода уруш бошланганидан бир неча ҳафта ўтиб, ҳусийлар Қизил денгиз ва Адан кўрфазидаги кемаларга ҳужумлар уюштиришни бошлади. Улар бу ҳаракатлари билан фаластинликларни қўллаб-қувватлаётганини таъкидлашди.
Шунингдек, улар АҚШ ва Буюк Британияга тегишли кемаларни “қонуний нишонлар” деб эълон қилишди.
Бунга жавобан Байден маъмурияти 2024 йилда расман “Ансор Аллоҳ” номи билан танилган ҳусийларни яна “махсус белгиланган глобал террорчи ташкилотлар” рўйхатига киритди.
Бу унчалик қатъий бўлмаган тасниф уруш вайрон қилган мамлакатга инсонпарварлик ёрдамини юбориш имконини берарди.
Трампнинг 22 январь кунги қарори хорижий террорчи ташкилотнинг янада қатъийроқ мақомини тиклашга қаратилган, дейилади хабарда.
Трампнинг ижроия фармонида айтилишича, ҳусийлар “фуқаролик инфратузилмасига, жумладан, Саудия Арабистонидаги фуқаро аэропортларига бир неча марта ҳужум қилган”, шунингдек “2023 йил октябрь ойидан бери Исроилга 300 дан ортиқ снаряд отган”.
Ушбу фармон бир неча ҳафтадан сўнг кучга кириши мумкин.
Изоҳ (0)