Ямандаги “Ансоруллоҳ” ҳаракати 14 июль куни Адан кўрфазида турган Исроил кемаларига зарба берган. Бу ҳақда Al Arabiya нашри хабар берди.
Манбада айтилишича, якшанба куни ҳусийлар бирданига икки ҳудудда амалиётлар ташкил этган. Ҳужумларнинг дастлабкиси Адан портидан жанубда, иккинчиси эса Қизил денгиз шимолида ўтказилган.
Ҳусийлар матбуот котиби Яҳё Сари ҳужум юзасидан баёнот эълон қилган. Унда айтилишича, Адан кўрфазида Исроилнинг MSC UNIFIC кемаси нишонга олинган. Кемага баллистик ракеталар ва дронлар билан зарба берилган.
Кейинги ҳужум Ақаба денгизи бўйидаги Исроилнинг Эйлат портига қаратилган. Портда тўхтаб турган Исроил кемалари учувчисиз қурилмалардан ўққа тутилган.
Ҳусийларнинг сўнгги амалиётлари шанба куни Ғазонинг Хон Юнис шаҳрига Исроил уюштирган ҳужумга жавобан амалга оширилган. Ўша ҳужумда камида 90 нафар фаластинлик ҳалок бўлиб, 300 га яқин киши жароҳат олган эди.
АҚШ Марказий қўмондонлиги якшанба куни эълон қилган баёнотида Қизил денгиз устида ҳусийларнинг жами 4 та ҳарбий дрони уриб туширилганини маълум қилган. Ҳудудда ҳаракатланаётган АҚШ ва Исроил кемаларига шикаст етмагани билдирилган.
Маълумот ўрнида, Яманнинг “Ансоруллоҳ” ҳаракати ўтган йилнинг ноябрь ойидан бери Қизил денгиз ва Адан кўрфазида халқаро юк танкерларига ҳужум уюштириб келмоқда. Гуруҳнинг айтишича, бу ҳаракатлар Исроилнинг Ғазодаги урушидан жабрланган фаластинликлар билан бирдамликни ифода этади.
Ҳусийлар ҳозирга қадар жами иккита йирик кемани чўктириб юборган. Ўнлаб кемалар ҳибсга олинган. Ҳужумларда уч нафар хорижлик денгизчи ҳалок бўлган.
Изоҳ (0)