Тошкент шаҳрининг Янгиҳаёт туманида 5,7 млрд сўмлик табиий газдан ноқонуний фойдаланган металл эритиш цехи аниқланди. Бу ҳақда “Ҳудудгазтаъминот” АЖ хабар берди.
Маълум қилинишича, туманнинг Спутник-3 мавзесидаги “Б.Б” МЧЖга қарашли бинода металл эритиш цехи ташкил этилиб, газ таъминоти корхонаси билан тегишли шартномани қайта тузмасдан, ўчириш мосламасига ўрнатилган бир марталик тамғага қасддан шикаст етказган ҳолда газдан ноқонуний фойдаланиб келган.
Ҳолат юзасидан тегишли тартибда далолатнома тузилиб, қайта ҳисоб-китоб амалга оширилди ва 5 млрд 775 млн сўмлик зарар ҳисобланди.
Барча ҳужжатлар ҳуқуқ-тартибот органларига юборилди.
Бундай ҳолатлар сони ортиб бормоқда
Самарқанд вилоятидаги корхоналардан бири 553 миллион сўмлик электрдан ноқонуний фойдалангани аниқланганди. Шу билан бирга Қашқадарёда 177 млн сўмлик газ ва “свет”дан ноқонуний фойдаланган шахслар ушлангани хабар қилинганди.
Шунингдек, Қашқадарёда электрдан ноқонуний фойдаланган корхона давлатга 1 млрд сўмдан зиёд зарар етказган. Бундан ташқари, Тошкент, Самарқанд ва Қашқадарё вилоятларида энергия ресурсларига ноқонуний уланиш ҳолатлари фош этилганди. Шунингдек:
- Бухорода 1,2 млрд сўмлик электрдан ноқонуний фойдаланилгани аниқланди
- Қорақалпоғистоннинг учта ҳудудида 845 млн сўмлик газдан ноқонуний фойдаланилди
- Бухоро ва Жиззахда электрдан ноқонуний фойдаланганлар 360 млн сўмдан зиёд зарар етказди
- Учта вилоятда қарийб ярим млрд сўмлик газдан ноқонуний фойдаланилди
Изоҳ (0)