Қирғизистонда 2019 йил август ойида Қўйтош қишлоғида содир бўлган тартибсизликлар бўйича суд бўлиб ўтмоқда. Айблов томони собиқ президент Алмазбек Атамбаевни 11 йилга озодликдан маҳрум этишни сўради. Бу ҳақда 24.kg хабар берди.
Хабарга кўра, Миллий хавфсизлик давлат қўмитасининг (МХДҚ) собиқ ходими Канат Сагимбаев учун 11 йиллик қамоқ жазоси сўралган. Шунингдек, яна уч нафар айбланувчи 10 йилдан озодликдан маҳрум этилиши мумкин.
2019 йил 7 август куни миллий хавфсизлик махсус кучлари Атамбаевнинг Қўйтошдаги қароргоҳини штурм қилишга уринган. Эртаси куни Ички ишлар вазирлиги ва миллий хавфсизлик ходимлари томонидан уни қўлга олиш бўйича яна бир махсус операция ўтказилган.
Хавфсизлик кучлари Атамбаевни Қўйтошдан олиб чиқишга муваффақ бўлган. Тарафдорлар эса хавфсизлик кучларига тош отган ва чиқиндиларга ўт қўйган. Икки кун давом этган тўқнашувларда 136 киши жароҳатланган. Махсус кучларнинг бир аскари ўқ тегиши оқибатида ҳалок бўлган.
Қирғизистоннинг собиқ президентига нисбатан бир нечта жиноий иш қўзғатилган. Жумладан, Қўйтош қишлоғидаги тартибсизликлар, коррупция ва жиноий даромадларни қонунийлаштириш бўйича. Шунингдек, унга Туркия фуқароларига ноқонуний паспорт бериш ва 2020 йил октябрь ойида оммавий тартибсизликлар уюштирганлик айблови қўйилган эди, бироқ судланувчи оқланган.
2023 йил бошида Қирғизистоннинг собиқ президенти Алмазбек Атамбоев колониядан чиққанди. Ўшанда у журналистларга ўзига нисбатан барча жиноий ишлар “уйдирма” эканини айтган. Кейинроқ собиқ президент Бишкекдан Дубайга учиб кетгани маълум бўлган. Алмазбек Атамбаев 2011—2017 йилларда Қирғизистон президенти сифатида фаолият юритган.
Изоҳ (0)