Қирғизистон Миллий хавфсизлик қўмитаси парламент сайловлари натижаларини эълон қилиш вақтида МСК сайтидаги узилишларни техник хато деб атади

Қирғизистонда 28 ноябрь куни бўлиб ўтган парламент сайловларининг дастлабки натижаларини чиқариш вақтида Марказий сайлов комиссияси сайтида кузатилган узилишларнинг сабаби техник хатолик эди. Бу ҳақда Қирғизистон Миллий хавфсизлик давлат қўмитаси (ГКНБ) матбуот марказига таяниб, «Коммерсантъ» хабар берди. МСК веб-сайтидаги носозлик туфайли ўнта партия гўё жами 150 фоиздан ортиқ овоз тўплаб, парламентга киргани ҳақида маълумот пайдо бўлганди.

«Миллий хавфсизлик давлат қўмитаси жиноят иши бўйича судгача бўлган иш юритиш материаллари доирасида 2021 йил 28 ноябрда бўлиб ўтган депутатлар сайловида МСКнинг расмий веб-сайтида нотўғри маълумотлар кўрсатилгани ҳолатини текширмоқда. МСК расмий веб-сайтида овоз беришнинг дастлабки натижалари эълон қилинаётганда сиёсий партиялар томонидан олинган овозлар сони тўғрисида нотўғри маълумотлар кўрсатилган. Бу ҳолат маълумотларни кўрсатиш саҳифасидаги формуланинг код қисмидаги хато билан изоҳланади», — дейилади ГКНБ баёнотида.

Қўмита маълумотларига кўра, сайтнинг дастурий кодини ишлаб чиқиш жараёнида «бюллетенлар сони ва номзодлар учун берилган бюллетенлар сонини қўшишда хатоликка йўл қўйилган, бунинг натижасида ортиқча маълумотлар кўрсатилган». Сайловлар давомида Марказий сайлов комиссиясининг ахборот тизимларига компьютер ҳужумлари содир этилди, бироқ улар муваффақиятли қайтарилди, дея хабар беради Қирғизистон ГКНБ.

28 ноябрь куни Қирғизистонда парламент сайловлари бўлиб ўтди. Ўша куни кечқурун овозларни электрон ҳисоблаш вақтида сайлов комиссиясининг сайтида носозлик кузатилди, у бир неча дақиқа ишламай қолди. Сайт яна ишлашни бошлагач, унда маълумотлар янгилангани ва беш фоизли «довон»дан ўтган партиялар сони ўнтадан олтитага тушиб қолгани аниқланган.

Бешта мағлубиятга учраган партия сайлов натижаларини қонуний деб тан олишдан бош тортди. Улар сайловолди кампаниясидаги қонунбузилишлар, шунингдек, натижаларни ҳисоблашдаги сохталаштиришлар ҳақида маълум қилган. Натижада МСК сайлов бюллетенларини қўлда қайта санашни бошлаган.

Президент Садир Жапаров Facebook орқали тизимдаги носозликда овозларни сохталаштиришга уриниш амалга оширилган бўлса, МСК аъзолари «боши билан жавоб беришини» ваъда қилган.