Қирғизистон президенти Садир Жапаров 25 октябрь куни Ўзбекистон Президенти Шавкат Мирзиёев билан телефон орқали мулоқот қилди. Бу ҳақда Қирғизистон президенти матбуот хизмати хабар қилди.
Телефон суҳбати чоғида Садир Жапаров Шавкат Мирзиёевни 24 октябрь куни бўлиб ўтган президентлик сайловида ишончли ғалаба қозонгани билан табриклаб, унга сиҳат-саломатлик, масъулиятли давлат фаолиятида янада муваффақиятлар, қардош Ўзбекистон халқига эса тинчлик ва фаровонлик тилади.
Бундан ташқари, икки давлат раҳбарлари икки томонлама кун тартибининг долзарб масалалари, икки мамлакат ўртасидаги келгусидаги ҳамкорлик истиқболлари, шунингдек, минтақавий ҳамкорлик масалаларини муҳокама қилди.
Тожикистон президенти Эмомали Раҳмон ҳам Шавкат Мирзиёевни сайловдаги ғалабаси билан қутлаб, телеграмма юборди.
«Ҳурматли Шавкат Миромонович, сизни Ўзбекистон Республикаси Президенти лавозимига қайта сайланганингиз муносабати билан самимий табрик ва эзгу тилакларимни йўллаш менга катта мамнуният бағишлайди.
Сизга мустаҳкам соғлиқ, фаровонлик ва дўст Ўзбекистоннинг барқарор тараққиёти йўлидаги ҳукумат фаолиятига янада самарали, унинг қардош халқига тинчлик, барқарорлик ва фаровонлик тилайман.
Сизнинг президентлик сайловларида ишончли ғалабангиз мамлакатни изчил ривожлантириш ва халқаро майдонда обрўсини мустаҳкамлашга қаратилган сиёсий йўналишингизни умумхалқ қўллаб-қувватлашининг яна бир ёрқин тасдиғидир.
Ишончим комилки, келгуси даврда сиз мамлакатга раҳбарлик қиласиз, қардош Ўзбекистон бу йўлда янги марраларни забт этади.
Сизнинг стратегик шериклик форматидаги Тожикистон ва Ўзбекистон ўртасидаги дўстлик, яхши қўшничилик ва конструктив муносабатларни ҳар томонлама ривожлантириш ва чуқурлаштиришга бўлган изчил интилишингизни юқори баҳолайман.
Ишончим комилки, биз биргаликдаги саъй-ҳаракатларимиз билан мамлакатларимиз халқлари фаровонлиги ва бутун минтақа манфаатлари йўлида тожик–ўзбек давлатлараро самарали ўзаро ҳамкорликни ривожлантиришда давом этамиз.
Фурсатдан фойдаланиб, икки давлат ўртасидаги муносабатлар мазмунини янги амалий мисоллар билан бойитиш бўйича келгусида ҳамкорликда ҳаракат қилишга тайёр эканимни билдираман», – дейилади Эмомали Раҳмон юборган телеграммада.
Маълумот учун, Ўзбекистонда президент сайлови 2021 йил 24 октябрь куни бўлиб ўтди. Мамлакат бўйлаб очилган 10 мингдан ортиқ сайлов участкалари тонг соат 8:00 дан кеч соат 20:00 га қадар сайловчиларни қабул қилди. Марказий сайлов комиссияси раиси Зайниддин Низомхўжаев берган маълумотга кўра, сайловда жами рўйхатга олинган 20 158 907 нафар сайловчининг 16 212 343 нафари, яъни сайловчиларнинг 80,4 фоизи овоз берди. Сайлов кодексининг 96-моддасига мувофиқ, агар сайловчилар рўйхатига киритилган фуқароларнинг 33 фоизи овоз беришда иштирок этган бўлса сайлов ўтган ҳисобланади.
Бундан ташқари Туркманистон президентни Гурбангули Бердимуҳаммедов ҳам телефон орқали суҳбатда Шавкат Мирзиёевни президентликка қайта сайлангани билан табриклади.
Президент сайловининг дастлабки натижаларига кўра,
- Баҳром Абдуҳалимов («Адолат») — 3,4 фоиз;
- Нарзулло Обломуродов (Экологик партия) — 4,1 фоиз;
- Алишер Қодиров (Миллий тикланиш) — 5,5 фоиз;
- Мақсуда Ворисова (ХДП) — 6,6 фоиз;
- Шавкат Мирзиёев (ЎзЛиДеП) — 80,1 фоиз овоз тўплаган;
Бундан аввал Валдимир Путин ва Қосим-Жўмарт Тўқаев Шавкат Мирзиёевни президентлик сайловидаги ғалабаси билан табриклаган эди.