Қирғизистонда ҳокимиятни зўравонлик билан эгаллашга тайёргарлик кўришда айбланиб, 15 дан ортиқ киши ҳибсга олинди. Бу ҳақда Қирғизистон Миллий хавфсизлик давлат қўмитаси (МХДҚ) маълумотларига таяниб, «РБК» хабар берди.
Қирғизистонда 28 ноябрь куни навбатдан ташқари патламент сайловлари ўтказилади. Хавфсизлик қўмитаси хабарига кўра, бир гуруҳ шахслар парламент сайловлари натижалари эълон қилинганидан кейин тартибсизликлар бошлашни режалаштирган.
«Айрим бузғунчи сиёсий кучлар, жумладан, парламент депутатлари ва собиқ юқори лавозимли амалдорлар бошчилигидаги бир гуруҳ шахсларнинг жиноий фаолиятига оид рад этиб бўлмайдиган далиллар қўлга киритилди. Бўлажак парламент сайловлари натижалари эълон қилинганидан кейин ушбу фуқаролар Бишкекда митинглар уюштириб, ҳокимиятни зўравонлик билан тортиб олишни режалаштиришган», — дейилади Миллий хавфсизлик давлат қўмитасида.
Қўмитанинг аниқлик киритишича, ташкилотчилар 1000 га яқин ёшларни тартибсизликларда иштирок этишга жалб қилган, улар билан «давлат тузилмаларига қарши мафкураларни сингдиришга қаратилган тизимли учрашувлар ўтказилган, оммавий тартибсизликлар келтириб чиқариш режалари муҳокама қилинган».
Хавфсизлик давлат қўмитаси Қирғизистон Республикаси Жиноят кодексининг 38 ва 309-моддалари «Ҳокимиятни зўравонлик билан эгаллаб олишга тайёргарлик кўриш» бўйича судга қадар иш бошлаган, бош прокуратура томонидан идоралараро тергов гуруҳи тузилган.
Тинтув чоғида қўлга олинганлардан ва уларнинг офисларидан ўқотар қуроллар, ўқ-дорилар ва гиёҳванд моддалар топилган.
«15 дан ортиқ гумондор қўлга олинди. Мазкур жиноят иши бўйича жиноий гуруҳнинг бошқа аъзолари ҳам аниқланмоқда, уларнинг қилмишларига ҳам тегишли ҳуқуқий баҳо берилади», — дея қўшимча қилди Миллий хавфсизлик давлат қўмитаси.
«24.кг» нашрининг ёзишича, махсус хизматлар, жумладан, «Чуй интимаги» ва «Эл интимаги» жамоат бирлашмалари аъзолари Азамат Мусакеев ва Нурбек Калекеевни қўлга олган.
Эслатиб ўтамиз, Қирғизистонда 2020 йил октябрь ойида бўлиб ўтган аввалги сайловлардан сўнг оммавий норозилик намойишлари бўлиб ўтганди. Қонунчилик мажлисига сайловда қатнашган 16 та партиянинг атиги тўрттаси ўтган, намойишчилар натижалардан норози бўлиб, қайтадан сайлов ўтказишни талаб қилган. Оқибатда Қирғизистоннинг ўша пайтдаги президенти Сўронбой Жээнбековнинг истеъфога чиқган, овоз бериш натижалари эса бекор қилинган.
Январь ойида бўлиб ўтган муддатидан аввалги президент сайловларида Жээнбеков кетганидан кейин ҳукумат тепасига келган Садир Жапаров ғолиб бўлди, у овозларнинг қарийб 80 фоизини тўплади. Жапаров президент ҳокимиятини мустаҳкамлаш билан шуғулланишини маълум қилган.
Май ойида Жапаров янги конституцияни имзолади. Янги асосий қонун бошқарувнинг президентлик шаклига ўтишини ва республикада ҳукумат тизимини ташкил этиш билан боғлиқ бошқа бир қатор ўзгаришларни, шу жумладан парламент аъзолари сонини ҳозирги 120 кишидан 90 кишигача қисқартиришни назарда тутади.
Октябрь ойида Қирғизистон президенти «Қирғизистон Республикаси Вазирлар Маҳкамаси тўғрисида»ги қонунга имзо чекди ва ўз ваколатларини сезиларли даражада кенгайтирди.
Изоҳ (0)