Қирғизистон Марказий сайлов комиссияси мамлакат парламенти Юқори Кенгашига ўтказилган сайлов натижаларини эълон қилди, деб хабар беради «Fergana.ru». Олий қонунчилик органига 5 фоизли «довон»ни босиб ўтган олтита партия ўтган.
«Ота юрт Қирғизистон» (айни вақтда мамлакатдаги ҳукмрон партия) партияси 17,32 фоиз овоз тўплаган ва 15 та депутатлик мандатини қўлга киритган бўлса, «Ишонч» 13,61 фоиз овоз билан янги парламент таркибидаги 12 та ўринга эга бўлади. Шунингдек, «Розилик» партияси 11 фоиз овоз билан 9 та мандат, «Альянс» (8,35 фоиз) — 7 та, «Ягона Қирғизистон» (7,04 фоиз) — 6 та ва «Имон нури» (6,17 фоиз) — 5 та ўринга эга бўлган.
Маълумотларга кўра, овоз бериш жараёнларида 1,281 миллион қирғизистонлик ёки жами сайловчиларнинг 34,94 фоизи иштирок этган.
Эслатиб ўтамиз, 28 ноябрь куни Қирғизистонда парламент сайловлари бўлиб ўтди. Ўша куни кечқурун овозларни электрон ҳисоблаш вақтида сайлов комиссиясининг сайтида носозлик кузатилди, у бир неча дақиқа ишламай қолди. Сайт яна ишлашни бошлагач, унда маълумотлар янгилангани ва беш фоизли «довон»дан ўтган партиялар сони ўнтадан олтитага тушиб қолгани аниқланган.
Бешта мағлубиятга учраган партия сайлов натижаларини қонуний деб тан олишдан бош тортди. Улар сайловолди кампаниясидаги қонун бузилишлар, шунингдек, натижаларни ҳисоблашдаги сохталаштиришлар ҳақида маълум қилган. Натижада МСК сайлов бюллетенларини қўлда қайта санашни бошлаган.
Президент Садир Жапаров Facebook орқали тизимдаги носозликда овозларни сохталаштиришга уриниш амалга оширилган бўлса, МСК аъзолари «боши билан жавоб беришини» ваъда қилган.
Изоҳ (0)