АҚШ расмийлари Эроннинг Америка собиқ етакчиси Дональд Трампга суиқасд уюштиришга урингани ҳақида разведка маълумотларини олди. Бу ҳақда CNN хабар берди.
CNN суҳбатдошларига кўра, Трампни отган Томас Метю Крукснинг бу фитнага алоқадорлиги ҳақида ҳеч қандай маълумот йўқ.
АҚШ расмийлари олган разведка маълумотлари махфий хизматни Трамп атрофида хавфсизлик чораларини кучайтиришга олиб келган. Шунингдек, махфий хизмат Трамп кампаниясини киришни назорат қилиб бўлмайдиган жойларда очиқ митинглар ўтказишдан бир неча бор огоҳлантирган, дейилади хабарда.
Трампга суиқасд уюштирилгандан бир кун ўтиб махфий хизмат вакили Энтони Гулелми Трампнинг хавфсизлигига “ҳимоя ресурслари ва имкониятлари” қўшилганини айтган.
Эрондан таҳдидлар Трамп сайловолди штаб-квартирасига етказилгани ёки йўқлиги номаълум, деб ёзади CNN.
Штаб президентликка номзоднинг хавфсизлиги билан боғлиқ маълумотларга изоҳ бермаслигини айтган.
CNN 2020 йил январида Ислом инқилоби қўриқчилари корпуси қўмондони Қосим Сулаймонийнинг америкалик ҳарбийлар томонидан ўлдирилгани учун Эрон қасос олишга бир неча бор ваъда берганини қайд этган. Трамп уни минглаб америкаликларнинг ўлими учун жавобгар деб атаган ва Сулаймоний “аввалроқ йўқ қилиниши керак”лигини таъкидлаган.
CNN манбаларига кўра, Трамп даврида давлат котиби лавозимида ишлаган Майк Помпео ҳам Эрон фитнасининг эҳтимолий нишони бўлган.
Дональд Трампга суиқасд
АҚШнинг собиқ президенти Дональд Трамп 14 июль куни Пенсилваниянинг Батлер шаҳридаги сайловолди митинги пайтида яраланган эди. Ҳодиса акс этган видеода унинг чиқиши чоғида ўқ овозига ўхшаш товушлар эшитилган. Шундан сўнг Трамп қулоғини ушлаб ётиб олган. Қўриқчилар шу заҳоти Трампни ўраб олган. Президентликка номзод ўрнидан турганида қулоғидан қон оқаётганини кўриш мумкин. Махсус хизмат агентлари уни қуршаб олиб, кўтарилишга ёрдам берган ва саҳнадан олиб кетган.
Бу ҳодиса қотилликка уриниш сифатида баҳоланмоқда. Ўқ узган шахс махсус хизмат ходимлари томонидан ўлдирилган.
Махфий хизмат томонидан ўлдирилган айбланувчи 20 ёшли Томас Метю Крукс эканлиги аниқланган.
Изоҳ (0)