Дональд Трампга голф майдонида суиқасд уюштирмоқчи бўлган Райан Рут агар уриниши муваффақиятсиз якунланса, ўқиш учун бир неча ой олдин хат ёзиб қўйгани аниқланди. Хат Райан Рут дўстининг уйидаги қутидан топилган. Бу ҳақида Politico суд ҳужжатларига таяниб хабар берди.
Мактубда Райан Рут Дональд Трампга суиқасд уюштиришни режалаштирганини маълум қилган ва агар уриниши ўхшамай қолса, унинг ишини якунлаб қўйишни бошқалардан сўраган. Бунинг учун Рут 150 минг доллар ваъда қилган.
“Бу Дональд Трампга суиқасд эди, лекин мен муваффақиятсизликка учрадим. Мен қўлимдан келганини қилдим ва бунга барча қобилиятимни сарфладим. Энди ишни тугатиш сизга боғлиқ. Ким ишни якунлай олса, мен 150 000 доллар таклиф қиламан”, деб ёзади Рут.
Шунингдек, у хатда Трамп президент бўлишга нолойиқ эканини ҳам ёзган. 15 сентябрь куни Дональд Трамп голф ўйнаётган клуб ёнида отишмалар содир бўлди. Трамп отишма содир бўлган жойдан бир неча юз метр нарида бўлган.
Махфий хизмат ходими буталар орасидан чиқиб қолган қурол стволини пайқаб, ҳамкасблари билан бирга дарҳол ўша томонга ўт очган. Шундан сўнг гумонланувчи буталар орасидан чиқиб, қора Nissan’га ўтириб, қочиб кетган. Полиция уни Мартин округига олиб борадиган катта йўлда қўлга олган.
Расмийлар Трампга суиқасд қилишда гумонланаётган шахс 58 ёшли Райан Уэсли Рут эканини хабар қилган. У икки модда бўйича 20 йилгача қамоқ жазосига ҳукм қилиниши мумкин.
Изоҳ (0)