АҚШнинг собиқ президенти Дональд Трампга суиқасд уюштиришда гумон қилинган Райан Уэсли Рут Россия президенти Владимир Путин ҳамда Шимолий Корея етакчиси Ким Чен Инни ўлдирмоқчи бўлган.
Бу ҳақда The Wall Street Journal (WSJ) нашрига 2022 йилда Украинада ҳамшира бўлиб ишлаган ва у ерда Рут билан бир неча бор учрашган америкалик Челси Уолш хабар берди.
Аёл иш пайтида хулқ-атвори унга “йиртқич” ва “антисоциал” туюлган одамлар рўйхатини тузган. Райан Рут ушбу рўйхатда биринчи бўлган. Киевдаги биринчи учрашувида Рут аёлга ғайриоддий туюлган, кейинги ўнлаб учрашувлар давомида ҳамшира эркакнинг хавфли эканини пайқаган. Аёлнинг сўзларига кўра, Рут Путин ва Ким Чен Инни ўлдириш истаги ҳақида гапирган, шунингдек, Трамп ва АҚШ президенти Жо Байденни тилга олган. Ҳамшира америкалик охирги икки сиёсатчига таҳдид қилганми ёки йўқлигини эслай олмаган.
Украинага ҳарбий амалиётларда қатнашиш учун келган исмини ошкор этмаган Франция фуқароси WSJ нашрига Райан Рут унга Украина армияси бўлинмасида лавозим олишига ёрдам берганини айтган. Французнинг таъкидлашича, Рут Трампдан ғазабланган, уни “Украинани ҳақиқатда қўллаб-қувватлаш ўрнига Путин билан келишувга эришишга ҳаракат қилган”ликда айблаган. АҚШ Марказий разведка бошқармасининг собиқ ходими Сара Адамснинг сўзларига кўра, Украинадаги кўнгиллилар орасида Рут “фирибгар ва руҳий касал одам сифатида танилган”. У хорижлик жангчиларни ёллашда Украина ҳукумати билан ҳамкорлик қилишини бир неча бор иддао қилган.
Reutersъга кўра, Райан Рут деярли 12 соат давомида голф майдонида Дональд Трампни кутиб ўтирган. Шу билан бирга, сиёсатчининг у ерга келиши оммавий равишда эълон қилинмаган ва гумонланувчи унинг режалари ҳақида билгани ёки йўқлиги номаълум.
Суиқасд қилишга уриниш 15 сентябрь оқшомида содир этилган. Суд Райан Рутни қурол сақлашда айблаган. Ҳибсга олиш бўйича суд мажлиси 23 сентябрга белгиланган.
Изоҳ (0)