АҚШ махфий хизмати раҳбари Кимберли Читл президентликка номзод Дональд Трампга суиқасд иши бўйича кўрсатма бериш учун Конгрессга чақирилади. Агентлик раҳбарига тегишли чақирув қоғози юборилади. Бу ҳақда Axios хабар берди.
“Гарчи Махфий хизмат раҳбари Читлнинг 22 июль куни қўмита мажлисида иштирок этиши кутилаётгани тасдиқлаган бўлса-да, нутқ сўзлашдан бош тортишга ҳар қандай уринишнинг олдини олиш учун раис унга чақирув қоғози юборади. Читл Конгресс ва Америка халқи олдида унинг ушбу лавозимда бўлган даврида содир бўлган тарихий муваффақиятсизлик учун жавоб бериши керак”, дейилади қўмита матбуот хизмати хабарида.
Қўмита АҚШ Махфий хизмати фаолияти устидан узоқ йиллик назорат тарихига эгалиги ва сўнгги пайтларда намоён бўлган нопрофессионалликни қабул қилмаслиги таъкидланган.
Дональд Трампга суиқасд
АҚШнинг собиқ президенти Дональд Трамп 14 июль куни Пенсилваниянинг Батлер шаҳридаги сайловолди митинги пайтида яраланган эди. Ҳодиса акс этган видеода унинг чиқиши чоғида ўқ овозига ўхшаш товушлар эшитилган. Шундан сўнг Трамп қулоғини ушлаб ётиб олган. Қўриқчилар шу заҳоти Трампни ўраб олган. Президентликка номзод ўрнидан турганида қулоғидан қон оқаётганини кўриш мумкин. Махсус хизмат агентлари уни қуршаб олиб, ўрнидан туришига ёрдам берган ва саҳнадан олиб кетган.
Бу ҳодиса қотилликка уриниш сифатида баҳоланмоқда. Ўқ узган шахс махсус хизмат ходимлари томонидан ўлдирилган.
Айни пайтда сиёсатчининг аҳволи яхши экани айтилмоқда. АҚШнинг амалдаги президенти Жо Байден Трампнинг хавфсизликда эканини ҳамда ўзини яхши ҳис қилаётганини эшитганидан хурсандлигини билдирган. Ҳар икки йирик партиянинг америкалик сиёсатчилари Трампни қўллаб-қувватловчи ва сиёсий зўравонликни қораловчи баёнотлар билан чиқмоқда.
Изоҳ (0)