Республикачилар партиясидан президентликка номзод Дональд Трампга суиқасд уюштиришда гумон қилинган Райан Уэсли Рут икки модда бўйича 20 йилгача қамоқ жазосига ҳукм қилиниши мумкин. Бу ҳақда Associated Press суд ҳужжатига таяниб хабар берди.
Унга кўра, Рут ўқотар қурол сақлаганликда айбланиб, 15 йиллик қамоқ ва 250 минг доллар жаримага, шунингдек, унинг қуролидаги серия рақами ўчирилгани учун яна беш йиллик қамоқ жазоси ва 250 минг доллар жаримага тортилиши мумкин.
Суиқасд тафсилотлари
Кеча, 15 сентябрь куни Дональд Трамп голф ўйнаётган клуб ёнида отишмалар содир бўлди. Трамп отишма содир бўлган жойдан бир неча юз метр нарида бўлган.
Президентлар ва собиқ президентларни қўриқлаш билан шуғулланадиган Махфий хизмат ходими буталар орасидан чиқиб қолган қурол стволини пайқаб, ҳамкасблари билан бирга дарҳол ўша томонга ўт очган.
Шундан сўнг гумонланувчи буталар орасидан чиқиб, қора Nissan’га ўтириб, қочиб кетган. Полиция уни Мартин округига олиб борадиган катта йўлда қўлга олган.
Маҳаллий полиция бошлиғининг айтишича, махфий хизмат агентларининг ўқлари гумонланувчига тегмаган. Буталар орасидан оптик мўлжаллагичли АК-47 русумли автомат, иккита рюкзак ва GoPro видеокамераси аниқланган.
Гумонланувчи Райан Уэсли Рут аслида ким?
Расмийлар Трампга суиқасд қилишда гумонланаётган шахс 58 ёшли Райан Уэсли Рут эканини хабар қилди.
Гумонланувчи тез-тез сиёсатчиларни, жумладан, Трамп ва Байденни танқид қилган. Рутнинг LinkedIn’даги профилида у Шимолий Каролина қишлоқ хўжалиги ва техника фанлари университетида ўқигани, 2018 йилда Ҳавайига кўчиб ўтгани айтилади.
Трамп суиқасдга қандай муносабат билдирди?
Дональд Трампнинг штаби воқеадан сўнг собиқ президентнинг баёнотини эълон қилди.
“Яқин атрофимда ўқ овозлари эшитилди, аммо миш-мишлар тарқалишидан олдин шуни эшитишингизни хоҳлайман: мен соғ ва саломатман! Мени ҳеч нарса тўхтата олмайди. Ҳеч қачон таслим бўлмайман! Мени қўллаб-қувватлаганингиз учун сизни доимо севиб қоламан”, деб ёзган Трамп.
Изоҳ (0)