АҚШ президенти Жо Байден қисқа вақт ичида Дональд Трампга иккинчи марта суиқасд уюштирилиши муносабати билан мамлакатда сиёсий зўравонликлардан огоҳлантирди.
Америка етакчиси Пенсилвания штатининг Филаделфия шаҳрида бўлиб ўтган анжуманда журналистлар олдида чиқиш қилган.
“Мен ҳар доим сиёсий зўравонликни қоралаганман ва бундан кейин ҳам қоралайман”, дейди Байден.
У мамлакатда келишмовчиликлар қурол билан эмас, балки сайлов орқали тинч йўл билан ҳал қилиниши кераклигини таъкидлаган.
“Америка қотилларнинг отишмасидан жуда кўп марта фожиаларга дуч келган. Бу ҳеч нарсани ҳал қилмайди. Бу шунчаки мамлакатни парчаламоқда. Биз зўравонликни олдини олиш учун ҳаракат қилишимиз ҳамда унинг илдиз отишига йўл қўймаслигимиз керак”, дея қўшимча қилган Америка етакчиси.
Байденга кўра, “юқори даражадаги сиёсатчиларни ҳимоя қилувчи Махфий хизмат қўшимча ёрдамга муҳтож”. У АҚШ Ички хавфсизлик департаменти таркибидаги агентлик ҳозирда қўшимча ходимларга эҳтиёж бор-йўқлигини ҳал қилаётганини таъкидлаган.
Изоҳ (0)