АҚШ Махфий хизмати раҳбари Кимберли Читл конгрессдаги тингловда Дональд Трампга суиқасд АҚШ Махфий хизматининг бир неча ўн йилликлардаги энг катта муваффақиятсизлиги бўлганини тан олди.
У қўл остидаги ходимларининг ҳаракатлари учун тўлиқ жавобгарликни ўз зиммасига олишини таъкидлади.
Читл ҳужумдан олдин митинг ҳудудида шубҳали шахс ҳақида маълумот бўлганини тасдиқлади.
“Шубҳали шахс юргани маълум қилинганди. Агар хавфсизлик ходимлари таҳдидлар ҳақида аниқ маълумотга эга бўлса, Трампнинг саҳнага чиқишига рухсат берилмаган бўларди”, дея тушунтирди у.
АҚШ Махфий хизмати Ички хавфсизлик департаменти таркибига киради. У давлат раҳбарларининг хавфсизлиги учун жавобгардир. Хавфсизлик биринчи навбатда президент, вице-президент (шу жумладан, сайланган, лекин ҳали лавозимга киришмаганлар) ва уларнинг оила аъзоларига таъминланади. Собиқ президентлар ва уларнинг турмуш ўртоқлари ўн йил муддатга ҳимоя қилинади. 1968 йилда Роберт Кеннедининг сайловолди митингида ўлдирилишидан сўнг Махсус хизмат сайловдан 120 кун олдин асосий президентликка номзодларни ҳам ҳимоя қилишга қарор қилди.
Трампга суиқасд 13 июль куни Пенсилванияда сайловолди ташвиқоти чоғида содир бўлган. Гумонланувчи, 20 ёшли Томас Метю Крукс воқеа жойидан юз метр нарида жойлашган саноат биносининг томида бўлган, у бир неча марта ўқ узган, шундан сўнг у йўқ қилинган.
Трамп қулоғидан яраланган, томошабинлардан бири ҳалок бўлган, яна икки нафари яраланган.
Изоҳ (0)