Бутун дунё Анант Амбани ва Радҳика Мерчантнинг тўйини бир неча ой давом этган қизиқарли телесериал каби томоша қилди. Аммо тўйларни дабдаба билан ўтказиш ҳиндларга хос одатий ҳол. Қуйида Ҳиндистон тарихидаги энг қимматбаҳо ва ҳашаматли 10 та тўй маросимларидан қизиқарли маълумотлар билан танишамиз.
Ранвир Сингҳ ва Дипика Падуконе: 12 миллион доллар
Олти йил давом этган муносабатлардан сўнг 2018 йилда Болливуд жуфтлиги Ранвир Сингҳ ва Дипика Падуконе гўзал табиат қўйнида — Италиядаги Комо кўли яқинида тўй маросимини ўтказди. Жуфтлик икки хил анъанада байрам уюштирди: конкани миллий анъанасига хос маросим d’Esteda вилласида, синдҳи анъаналаридаги иккинчи маросим эса Роккабруна меҳмонхонасида ўтказилди.
Сўнг келин-куёв Ҳиндистонга қайтиб келди ва Дипика Падуконенинг она шаҳри Бангалорда ва Мумбай шаҳрида маросимлар давом этди.
Адел Сажан ва Сана Хон: 15 миллион доллар
2017 йилнинг апрель ойида тадбиркор Адел Сажан ва актриса Сана Хон турмуш қуришди. Тўй маросими Барселонадан Италияга кетаётган Costa Fascinosa кемасида бўлиб ўтди. Меҳмонлар бир неча кунга Францияда ҳам тўхтаб қолди.
Келин-куёв меҳмонларга Harrods брендидан эксклюзив совғаларни тақдим этди. Тадбир 10 қаватли ҳашаматли тортни кесиш маросими билан якунланди.
Вират Коҳли ва Анушка Шарма: 15 миллион доллар
2017 йил декабрь ойида Ҳиндистоннинг крикет жамоасининг собиқ капитани Вират Коҳли ва Болливуд актрисаси Анушка Шарма Италиянинг Комо кўлида турмуш қурди. Тўй маросими ҳинду анъаналарига амал қилган ҳолда ўтказилди.
Сўнг эр-хотин Мумбайда таниқли шахслар ва спортчилар йиғилган ҳашаматли ресторанда зиёфат уюштирди. Кейин байрам Деҳлида давом этди. Тўйга ҳурматли меҳмонлардан Ҳиндистон бош вазири Нарендра Моди ташриф буюрди.
Сонам Васвани ва Навин Фабиани: 30 миллион доллар
2017 йилда йирик Stallion Group конгломерати асосчиси, магнат Сунил Васванининг қизи Сонам Васвани нуфузли тадбиркор Камол Фабианининг ўғли Навин Фабиани билан турмуш қурди. Байрамнинг биринчи куни ҳашаматли Ферстел саройида, иккинчи қисми эса меъморий гўзаллиги ва тарихий аҳамияти билан машҳур бўлган Белведер саройида бўлиб ўтди. Тўйга таклиф этилган Голливуднинг машҳур қўшиқчиси Бруно Марс ушбу кунда барча учун унутилмас таассуротлар қолдирди.
Ваниша Миттал ва Амит Бҳатия: 66 миллион доллар
Пўлат қуйиш заводлари гиганти Лакшми Митталнинг қизи Ваниша 2004 йилда лондонлик банкир Амит Бҳатига турмушга чиқди. Парижда бўлиб ўтган тўй маросими олти кун давом этди. Байрам дастури доирасида хонанда Кайли Миноуг, Болливуд юлдузлари Шоҳрух Хон ва Айшвария Рай каби юлдузларнинг чиқишлари бўлиб ўтди. Асосий тўй маросими 17-асрда қурилган Во-ле-Виконт қасрида бўлиб ўтди. Сарой боғларида ҳинд анъанавий маросими — мандапани ўтказиш учун мумбайлик 35 дан ортиқ гулчилар ва декорация мутахассислари жалб қилинди.
Шристи Миттал ва Гулраж Бел: 70 миллион доллар
2013 йилда пўлат қуйиш заводлари магнати Прамод Митталнинг қизи Шристи Миттал банкир Гулраж Белга турмушга чиқди. Тўй Барселонада уч кун давом этди. Тадбирга беш юзга яқин меҳмонлар таклиф қилинди ва дастурхонга энг сара таомлар тортилди, жумладан, испаниялик машҳур ошпаз Сержи Арола меҳмонлар учун 60 кг оғирликдаги олти қаватли байрам тортини тақдим этди. Тўй маросими унутилмас бўлиши ва фотосуратчилар байрамни ҳар томонлама тасвирга олиши учун вертолётлар ижарага олинди.
Браҳмани ва Ражив: 74 миллион доллар
2016 йилда сиёсатчи, илгари ноқонуний кончилик фаолияти учун ҳибсга олинган Жанардхан Редди қизи Браҳманининг тўйини кенг миқёсда нишонлади. Маросимлар беш кун давом этди ва Бангалор саройида бўлиб ўтди. Тадбирга 50 000 дан ортиқ меҳмонлар таклиф қилинди ва байрам ўша даврнинг энг йирик тўй маросимларидан бирига айланди.
Сушанто ва Симанто Ройнинг қўшалоқ тўйи: 75 миллион доллар
2004 йилда таниқли бизнес-магнат Субрата Рой иккала ўғлини бир кунда уйлантирди ва катта қўшалоқ байрам ўтказди. Тадбир Лакҳнаудаги Саҳара стадионида бўлиб ўтди ва бир ҳафта давом этди. Унга 11 мингдан ортиқ меҳмон, жумладан, Болливуд юлдузлари ва машҳур спортчилар ташриф буюрди. Дунёнинг турли бурчакларидан келган меҳмонларга қулайлик яратиш мақсадида хусусий авиақатновлар ташкил этилди.
Иша Амбани ва Ананд Пирамал: 100 миллион доллар
2018 йилда таниқли миллиардер Мукеш Амбанининг қизи Иша Амбани Ананд Пирамал билан турмуш қурди. Тўй маросими бир ҳафта давом этди ва бутун дунё бўйлаб бир нечта жойларни қамраб олди. Байрам тадбирлари Удайпурда, Италиянинг машҳур Комо кўлида ва Мумбай шаҳрида бўлиб ўтди. Асосий маросим Ҳиндистондаги Пичола кўли яқинидаги хусусий оролда бўлиб ўтди.
Анант Амбани ва Радҳика Мерчант: 150 миллион доллардан ортиқ
Анант Амбани ва Радҳика Мерчантнинг тўйи ҳақиқатан ҳам бутун дунё эътиборини тортди. Июль ойида ўтказилган энг йирик маросимнинг ўзи уч кун давом этди. Миллиардерлар оиласи барча тадбирлар ва совға-саломларга қанча маблағ сарфлагани расман ошкор этилмаганига қарамай, мутахассисларнинг фикрича, харажатлар 150 миллион доллардан ортиқ бўлган. Тўйга ташриф буюрган юлдузларнинг гонорарлари ҳам жуда юқори. Миш-мишларга кўра хонанда Рианнага 7 миллион доллар, Жастин Биберга эса 10 миллион доллар ҳақ тўланган.
Изоҳ (0)