Тожикистон ҳукумати Жаҳон банки билан Роғун гидро электр станцияси (ГЭС) қурилишини якунлаш учун 650 миллион доллар миқдорида грант келишуви ажратиш бўйича музокараларни якунламоқда. Бу ҳақда Эмомали Раҳмон электр станцияси қурувчилари билан учрашувда маълум қилди.
Осиё инфратузилма инвестиция банки (ОИББ) билан 500 миллион доллар миқдорида кредит шартномасини имзолаш бўйича музокаралар ҳам якуний босқичда.
Шунингдек, бошқа араб тараққиёт фондлари, жумладан ОПЕК Халқаро тараққиёт фонди, Қувайт тараққиёт фонди, Абу-Даби фонди ва Италиянинг Жамғарма-траст фонди томонидан ҳам 100 миллион доллар ажратиш тўғрисидаги қарорлар қабул қилинганди, деди Раҳмон.
У Ислом тараққиёт банки билан 150 миллион доллар ва Саудия тараққиёт жамғармаси билан 100 миллион доллар миқдорида имтиёзли кредитлаш шартномалари имзоланганини эслатди. Осиё тараққиёт банкининг грант маблағларини, Европа инвестиция банки ва Қатар жамғармасининг имтиёзли кредитларини жалб қилиш бўйича ишлар олиб борилмоқда.
Тожикистон ҳукумати 2008-2024 йилларда ГЭС қурилишини якунлашга давлат бюджети ва бошқа манбалардан 42,5 миллиард сомонийдан ортиқ маблағ йўналтирган.
Эмомали Раҳмон “Роғун” тақдирий аҳамиятга эга объект деб эълон қилинганини айтди.
Чунки ГЭС Тожикистоннинг энергетик мустақиллигига эришиш, мамлакатнинг барқарор иқтисодий ривожланиши, халқнинг турмуш даражаси ва сифатини юксалтириш, Ватанни обод қилиш учун мустаҳкам пойдевор яратмоқда, деди у.
Унинг сўзларига кўра, станциянинг дастлабки иккита агрегати орқали 2018 йилдан бугунги кунгача 7,5 миллиард киловатт-соат электр энергияси ишлаб чиқарилган.
Ҳозирги кунда гидроэлектр станцияси қурилишида 17 мингдан ортиқ ишчи ва муҳандис-техник ходимлар меҳнат қилмоқда, уларнинг сони 2023 йилга нисбатан 3 минг кишига ошган.
Изоҳ (0)