O‘zbekistonning Malayziyadagi elchisi Karomiddin Gadoyev ushbu mamlakatning Malakoff Corporation Berhad kompaniyasi bosh ijrochi direktori Anvar Shaxrin Abdul Ajib bilan uchrashuv o‘tkazdi. Bu haqda “Dunyo” AA xabar berdi.
Malayziya tomoniga O‘zbekistonda “yashil” energiya sanoati istiqboli, ayniqsa gidroenergiya bo‘yicha foydalanilmayotgan ulkan imkoniyatlar mavjudligi taʼkidlandi. Malayziya tomoniga respublika hududlarida daryo va kanallarda kichik gidroelektr stansiyalarini qurish hamda yirik quvvatli gidroinshootlarni barpo etish loyihalarini amalga oshirish taklif etildi.
Anvar Shaxrin Abdul Ajibning aytishicha, kompaniya Malayziyadagi eng yirik mustaqil energiya ishlab chiqaruvchisi hisoblanadi. Umumiy quvvati 8782 MVt bo‘lgan issiqlik va 173 MVt qayta tiklanuvchi elektr stansiyalariga egalik qiladi.
“O‘zbekistonda ‘yashil’ energiya sohasida amalga oshirilayotgan islohotlar menda katta taassurot qoldirdi. Mamlakatingiz erishgan natijalar va ulkan rejalardan ilhomlanib, o‘zaro hamkorlik imkoniyatlarini o‘rganish uchun joriy yilda O‘zbekistonga borishni rejalashtiryapmiz”, degan u.
Malakoff Corporation Berhad kompaniyasi 1975-yil 9-oktyabrda tashkil etilgan. Uning asosiy faoliyati elektr energiyasi ishlab chiqarish, sho‘r suvni chuchuklashtirish, ekspluatatsiya va texnik xizmat ko‘rsatish hamda chiqindilarni boshqarishdan iborat.
2024-yilning dekabr oyida O‘zbekiston Jahon banki guruhi ko‘magida Xorazm viloyatida yangi quyosh elektr stansiyasini ishga tushirishi haqida xabar berilgandi.
Xorazm viloyatidagi yangi quyosh elektr stansiyasi
2024-yilning fevralida Shavkat Mirziyoyevning Xorazm viloyatiga tashrifi chog‘ida Tuproqqalʼa tumanida Voltalia kompaniyasi tomonidan quvvati 100 megavattlik quyosh elektr stansiyasi qurilishini boshlash marosimi bo‘lib o‘tgandi. Bu Xorazmdagi ilk shunday yirik loyihadir. Bu loyiha ishga tushsa, Xorazm viloyatida elektr energiyasi ishlab chiqarish quvvatlari 30 foizga oshib, 424 megavattga yetadi. Xususan, Tuproqqalʼa tumanining elektrga bo‘lgan yillik 135 million kilovatt soat talabi to‘liq qondiriladi.
Fransiyaning Voltalia kompaniyasi qayta tiklanuvchi energetika sohasidagi inshootlarni qurishda boy tajribaga ega. Hozirda dunyoning 20 mamlakatida umumiy qiymati 10 milliard dollardan ziyod investitsiya loyihalarini amalga oshirmoqda.
Izoh (0)