Ўзбекистонда гидроэлектр станциялари томонидан қанча электр энергия ишлаб чиқарилгани маълум қилинди.
Статистика агентлиги маълумотларига кўра, 2024 йилнинг 9 ойида йирик гидроэлектр станциялари томонидан жами 6 410,9 миллион кВц электр энергияси ишлаб чиқарилган.
Таққослаш учун, 2023 йилда бу кўрсаткич 5 465,5 миллион кВц ни ташкил қилган.
Аввалроқ IRENА агентлиги “2023 йилда қайта тикланадиган энергия манбаларидан электр энергияси ишлаб чиқариш қиймати” йиллик ҳисоботини эълон қилганди.
Унга кўра, бутун дунёда қуёш генерацияси ва гидроэнергетика ўртасидаги электр энергияси ишлаб чиқариш таннархи фарқи ортиб бормоқда.
2022 йилда янги ГЭСлар энергияси қуёш электр станциялари энергиясидан 20 фоиз қимматроқ бўлган, 2023 йилга келиб бу фарқ 30 фоизгача етди. Мутахассислар бу янги энергия қувватларини қуришни режалаштиришда ҳал қилувчи аҳамиятга эгалигини айтмоқда.
2023 йилда гидроэнергетика қувватларини қуриш 1 киловатт ўрнатилган қувват учун 2800 АҚШ долларини ташкил этди. Бу қуёш электр станцияларига нисбатан 3,5-4 баробар, қуруқликдаги шамол электр станцияларига нисбатан 2,5 баробар қиммат ва денгиз шамол қурилмаларини қуриш билан тахминан бир хил нархда эди.
Бундан ташқари, ГЭС қурилишининг ўртача муддати қуёш электр станцияларига нисбатан 7-10 баробар, шамол электр станцияларига нисбатан эса 5 баробар узоқроқ давом этади.
“Шундай қилиб, яқин йилларда ГЭСнинг ягона қиёсий устунлиги фақат кун давомида энергия ишлаб чиқаришни мослашувчан тарзда бошқариш қобилияти бўлиб қолиши мумкин”, дейилади агентлик ҳисоботида.
Изоҳ (0)