Чеченистон раҳбари Рамзан Қодировнинг 17 ёшли ўғли Адам Қодиров Россия гвардиясининг “Жанговар хизматлари учун” идоравий медали билан тақдирланди. Бу ҳақда Чеченистон ҳукумати раиси Магомед Даудов ўзининг Instagram саҳифасида маълум қилди.
“Жанговар хизматлари учун” медали “Росгвардия”да 2017 йилда таъсис этилган. Мукофот жасорат, фидойилик, ташаббускорлик, муваффақиятли бошқарув ва жанговар вазифаларни бажаришдаги бошқа хизматлар учун берилади.
Даудовнинг таъкидлашича, ушбу мукофотнинг Адам Қодировга топширилиши унинг “махсус ҳарбий операцияга” (Россия Украинадаги урушни шундай деб атайди) шунингдек, “хавфсизлик ва ҳуқуқ-тартиботни мустаҳкамлашга қўшган улкан ҳиссаси”нинг эътирофи бўлди.
Адам ёшлигидан Чеченистон биринчи президенти Аҳмад-Ҳожи Қодировдан ўрнак олиб, ўз халқи ва ватанига хизмат қилиш учун фидойилик кўрсатмоқда. У масъулиятли ва интилувчан йигит бўлиб, етакчимиз Рамзан Қодиров унга доимо энг муҳим йўналишлар ва вазифаларни ишониб топширади. Бугун Адам махсус ҳарбий операцияда ғалабага эришишга муносиб ҳисса қўшмоқда, олий бош қўмондон Владимир Путин номидаги Россия махсус кучлар университетини муваффақиятли назорат қилмоқда, деб ёзди Даудов.
Адам Қодиров 2023 йил сентябрь ойида Қуръонни ёқиб юборгани учун ҳибсга олинган Никита Журавелни калтаклагани билан машҳур бўлган. Ўшандан бери кичик Қодиров бир неча бор мукофотланган ва республика тузилмаларида муҳим лавозимларга тайинланган.
Бошқалар қаторида у Чеченистон Қаҳрамони унвонини олган, отасининг хавфсизлик хизмати бошлиғи, шунингдек, Россия махсус кучлар университети ва Ички ишлар вазирлигининг Чеченистон бўйича куратори бўлган. 2024 йил октябрь ойида унинг номи хавфсизлик хизматининг энг ёш раҳбари сифатида Россия рекордлар китобига киритилган. Ўшанда у атиги 16 ёшда эди. 2025 йил март ойида Адам Ички ишлар вазирлигининг минтақавий бошқармаси куратори этиб тайинланди.
Изоҳ (0)