Чеченистон раҳбари Рамзан Қодировнинг ўғли Адам Қодиров ислом динини мустаҳкамлаш ва унинг қадриятларини ҳимоя қилишга қўшган катта шахсий ҳиссаси учун 1-даражали “Ислом динига хизматлари учун” ордени билан тақдирланди. Бу ҳақда Чеченистон миллий сиёсат, ташқи алоқалар, матбуот ва ахборот вазири Аҳмад Дудаев маълум қилди.
Сентябрь ўрталарида 15 ёшли Адам Қодиров Қуръонни ёқиб, диндорларнинг туйғуларини ҳақоратлашда айбланаётган волгоградлик Никита Журавелни Чеченистон тергов изоляторида калтаклагани акс этган видео эълон қилинганди. Рамзан Қодиров ўғлининг қилмишидан фахрланишини айтган. Шундан сўнг давлат ва ҳуқуқ-тартибот идораларининг юқори мартабали вакиллари, ҳукуматпараст “ҳуқуқ ҳимоячилари” видеога фақат изоҳ берди (шунда ҳам ҳаммаси эмас). Бироқ мурожаатларга қарамай, аслида нима бўлганини тергов қилиш учун ҳеч қандай иш амалга ошрилмади.
4 октябрь
База нашри ҳуқуқ-тартибот идоралари ниҳоят Қодиров ўғлининг Журавелга ҳужуми бўйича терговни бошлагани ва буни Грозний полициясига топширгани ҳақида хабар берди. Аммо,бир неча соат ўтгач Грозний полицияси Адам Қодиров 15 ёшга тўлгани, яъни жиноий жавобгарлик ёшига етмагани сабабли жиноий иш қўзғатишдан бош тортгани маълум бўлди. Россия ҳуқуқ-тартибот идоралари томонидан бошқа ҳеч қандай муносабат билдирилмади.
6 октябрь
Адам Қодировга Чеченистон Республикаси Қаҳрамони унвони берилди. Бу ҳақда хабар берган Давлат Думаси депутати Адам Делимхонов Қодировнинг 15 ёшли ўғлини “ўта қобилиятли, ҳар томонлама билимли ва мақсадли йигитнинг ёрқин намунаси” деб атади.
15 октябрь
Рамзан Қодиров яна ўғлининг Журавелни калтаклагани акс этган видеони эълон қилди. Видео Чеченистон байроғи фонида Адам Қодировнинг сурати ва “Бўри тузоққа тушиб қолса, қандай қилиб қочиш ҳақида эмас, қандай қилиб қасос олиш ҳақида ўйлайди” деган сўзлар билан бошланади. Видео остида Чеченистон раҳбари кичик Қодировни “чечен халқининг тан олинган муносиб ўғлони” ва “барча мусулмонлар қаҳрамони” деб атаган.
24 октябрь
Татаристон раҳбари Рустам Миннихонов Адам Қодировни республиканинг иккинчи муҳим мукофоти — “Дўстлик” ордени билан тақдирлади. Кичик Қодиров “миллатлараро ва конфессиялараро тинчлик ва тотувликни мустаҳкамлашга қўшган катта ҳиссаси учун” тақдирлангани айтилди.
25 октябрь
Қорачой-Черкесия Республикаси раҳбари Рашид Темрезов Адам Қодировни республиканинг олий давлат мукофоти — “Қорачой-Черкесия Республикаси олдидаги хизматлари учун” ордени билан тақдирлади. Рамзан Қодировнинг ўғли ушбу мукофотга “миллатлараро ва минтақалараро бирдамликни ривожлантириш, анъанавий ислом қадриятларини мустаҳкамлашга қўшган шахсий ҳиссаси учун” сазовор бўлган ва Темрезов уни “кичик ватани ва Россиянинг ҳақиқий ватанпарвари” деб атади.
4 ноябрь
Адам Қодиров Чеченистон раҳбарининг хавфсизлик бўлими бошлиғи этиб тайинланди. “Ҳурматли жиянимнинг бундай лавозимга тайинланиши мутлақо адолатли. Адам Рамзонович болалигиданоқ ўзини муносиб инсон сифатида кўрсатди, унинг учун ор-номус ва қадр-қиммат тушунчалари биринчи ўринда туради”, деб ёзди Делимхонов кичик Қодиров ҳақидаги янги постида.
5 ноябрь
Рамзон Қодиров Шимолий Кавказ мусулмонлари фаолиятини мувофиқлаштириш маркази раиси, Қорачой-Черкесия муфтийси Исмоил-Хожи Бердиев ўғли Адамни 1-даражали “Уммат олдидаги хизматлари учун” ордени билан тақдирлагани ҳақида хабар берди.
7 ноябрь
Адам Қодиров “Кабардин-Болқор Республикаси олдидаги хизматлари учун” ордени билан тақдирланди. “Рамзан Ахматович президентимиз Владимир Путин томонидан ўзига юкланган вазифаларни муносиб бажариб, мамлакатимиз хавфсизлиги ва яхлитлигини мустаҳкамлашга катта ҳисса қўшмоқда. Фарзандларини ҳам шундай руҳда тарбиялаяпти”, деди вилоят раҳбари Казбек Коқов. У 15 ёшли Қодиров қандай хизматлари учун орден олганига аниқлик киритмаган.
9 ноябрь
Адам Қодиров ва унинг икки акаси, 18 ёшли Ахмат ва 16 ёшли Эли Чеченистон парламентининг энг олий “Ватан шарафи” ордени билан тақдирланди. Республика маъмурияти улар “ёш авлод учун ёрқин ўрнак” эканини таъкидлади.
Адам Қодировнинг ютуқлари
Адам 15 ёшда. Делимхановнинг сўзларига кўра, кичкина Қодиров ҳофизи Қуръон ҳисобланади. Бундан ташқари у турли фанларни яхши ўқийди, тарихга, тил ўрганиш ва адабиётга қизиқади. Тактик ўқ отиш бўйича 10-очиқ чемпионатда у биринчиликни қўлга киритган.
Ундан олдин Чеченистон раҳбари Рамзан Қодировнинг қизи Айшат Қодирова бош вазирнинг ижтимоий блок бўйича ўринбосари этиб тайинлангани тўғрисида хабар берилганди.
Изоҳ (0)