Чеченистон раҳбари Рамзан Қодиров опасининг ўғли Адам Черхиговни Чеченистон транспорт, коммуникация ва рақамли ривожланиш вазири лавозимига тайинланди. Бу ҳақда Қодировнинг ўзи Telegram каналида маълум қилди.
Адам ёш бўлишига қарамай, раҳбарлик лавозимларида катта тажрибага ва вазирлик олдида турган вазифаларни самарали ва сифатли бажариш учун зарур профессионал кўникмаларга эга, — дейди Чеченистон раҳбари.
Адам Черхигов республика раҳбарининг опаси Зарган Қодированинг ўғли ҳисобланади. Аввалроқ Рамзан Қодировнинг тўнғич ўғли, 18 ёшли Ахмат Чеченистон спорт вазири этиб тайинланганди. Февраль ойидан буён у Ёшлар ишлари вазири, унгача Жисмоний тарбия ва спорт вазирининг биринчи ўринбосари лавозимида ишлаб келган.
Шунингдек, Ахматнинг 24 ёшли опаси Хадижат жорий йилнинг февраль ойидан бери Чеченистон раҳбари администрацияси бошлиғи ўринбосари лавозимини эгаллаб келмоқда. 25 ёшли Айшат Қодирова эса Чеченистон ҳукумати раҳбари ўринбосари ҳисобланади. Бунгача у Чеченистон маданият вазири лавозимида фаолият юритган. Рамзан Қодировнинг 16 ёшли ўғли Адам ҳам машҳурликдан қолишмайди. У Чеченистон раҳбарининг хавфсизлик бўлимига раҳбарлик қилади. Рамзан Қодиров ва унинг оиласи мунтазам равишда тақдирланиб, юқори лавозимларга тайинланиб келади.
“Қариндошларимнинг ҳар қандай муассаса ва ҳар қандай лавозимдаги талаби ўн баробар кўп, чунки улар менга қарамай ишлашларини исботлаши керак. Кимга ишонсам, ўшани тайинлайман”, — деган эди Қодиров бу борада.
Изоҳ (0)