Checheniston rahbari Ramzan Qodirovning 17 yoshli o‘g‘li Adam Qodirov Rossiya gvardiyasining “Jangovar xizmatlari uchun” idoraviy medali bilan taqdirlandi. Bu haqda Checheniston hukumati raisi Magomed Daudov o‘zining Instagram sahifasida ma’lum qildi.
“Jangovar xizmatlari uchun” medali “Rosgvardiya”da 2017-yilda ta’sis etilgan. Mukofot jasorat, fidoyilik, tashabbuskorlik, muvaffaqiyatli boshqaruv va jangovar vazifalarni bajarishdagi boshqa xizmatlar uchun beriladi.
Daudovning ta’kidlashicha, ushbu mukofotning Adam Qodirovga topshirilishi uning “maxsus harbiy operatsiyaga” (Rossiya Ukrainadagi urushni shunday deb ataydi) shuningdek, “xavfsizlik va huquq-tartibotni mustahkamlashga qo‘shgan ulkan hissasi”ning e’tirofi bo‘ldi.
Adam yoshligidan Checheniston birinchi prezidenti Ahmad-Hoji Qodirovdan o‘rnak olib, o‘z xalqi va vataniga xizmat qilish uchun fidoyilik ko‘rsatmoqda. U mas’uliyatli va intiluvchan yigit bo‘lib, yetakchimiz Ramzan Qodirov unga doimo eng muhim yo‘nalishlar va vazifalarni ishonib topshiradi. Bugun Adam maxsus harbiy operatsiyada g‘alabaga erishishga munosib hissa qo‘shmoqda, oliy bosh qo‘mondon Vladimir Putin nomidagi Rossiya maxsus kuchlar universitetini muvaffaqiyatli nazorat qilmoqda, deb yozdi Daudov.
Adam Qodirov 2023-yil sentyabr oyida Qur’onni yoqib yuborgani uchun hibsga olingan Nikita Juravelni kaltaklagani bilan mashhur bo‘lgan. O‘shandan beri kichik Qodirov bir necha bor mukofotlangan va respublika tuzilmalarida muhim lavozimlarga tayinlangan.
Boshqalar qatorida u Checheniston Qahramoni unvonini olgan, otasining xavfsizlik xizmati boshlig‘i, shuningdek, Rossiya maxsus kuchlar universiteti va Ichki ishlar vazirligining Checheniston bo‘yicha kuratori bo‘lgan. 2024-yil oktyabr oyida uning nomi xavfsizlik xizmatining eng yosh rahbari sifatida Rossiya rekordlar kitobiga kiritilgan. O‘shanda u atigi 16 yoshda edi. 2025-yil mart oyida Adam Ichki ishlar vazirligining mintaqaviy boshqarmasi kuratori etib tayinlandi.
Izoh (0)