Чеченистон ҳукумати республика қаҳрамонлари шарафига исм қўйилган 180 та чақалоқнинг оилаларига ярим миллион рублдан (қарийб 5 минг доллар) тўлашини маълум қилди.
Чеченистон раҳбари Рамзан Қодиров Тарих йили муносабати билан ўтказилган тадбир натижаларини якунлаб, 31 декабрь куни “миллий қаҳрамонлар” шарафига номланган ўғил болалар туғилган оилаларга 500 минг рублдан тўлаш ҳақида кўрсатма берди. Қиз фарзандли оилаларга тўлов назарда тутилмаган.
Энг машҳур учликка лашкарбоши Бойсунгур Бeнoyeвский (97 та чақалоқ), Кавказнинг биринчи имоми Шайх Мансур (53 та чақалоқ) ва Чеченистоннинг биринчи президенти Аҳмат-Ҳожи Қодиров (23 та чақалоқ) исмлари киритилган.
Шунингдек, Муҳаммад-Башир, Зелимхон, Берса, Берса-Шайх, Илёс, Муҳаммад, Магомед, Мансур, Мусо, Муслим, Шоип, Эрисхон исмлари ҳам қайд этилган.
Тўловлар учун маблағ Россия қаҳрамони Аҳмад-Ҳожи Қодиров номидаги Минтақавий жамоат фондидан ажратилган.
Аввалроқ Чеченистон раҳбари Рамзан Қодиров моделларни мусулмон аёлларга номуносиб тарзда реклама қилаётган гўзаллик салонларини ёпишга чақирган эди.
Салонлар намойиш қилиш мумкин бўлмаган тана қисмларини кўрсатувчи суратларни тарқатмоқда. Одамларни бузадиган салонларни, албатта, ёпиш керак, деди Қодиров.
Чеченистон раҳбари хизмати туфайли ташриф буюрувчилар касалхонага тушиб қоладиган салонлар фаолиятини ҳам тўхтатишга чақирди. Бундан ташқари, Қодиров яқин келажакда Грозний шаҳрида эркаклар ва аёллар учун алоҳида хизмат кўрсатадиган 15 та дорихона очилишини айтди. Республика пойтахтида шундай дорихоналардан бири очилган.
Изоҳ (0)