Чеченистонда ҳуқуқбузарлар, жумладан, йўл ҳаракати қоидаларини бузувчилар “махсус ҳарбий операция” (Россия Украинадаги урушни шундай номлайди) зонасига юборилади. Бу ҳақда республика раҳбари Рамзан Қодиров хабар берди.
Қодироб куч тузилмаси қўмондонлари ва раҳбарлари билан ўтказилган йиғилишда муаммоли ёшлар билан янада самаралироқ ишлаш зарурлигини айтди. У ёшлар орасида мунтазам равишда ҳуқуқбузарлик содир этиб, “бекорчи, ахлоқсиз турмуш тарзини” олиб бораётганлар ҳам борлигини таъкидлади.
Чеченистон раҳбари бундай ҳуқуқбузарликлар қаторига йўл ҳаракати қоидаларини қасддан бузиш, белгиланмаган жойда тўхташ ва тақиқланган моддалар таъсирида транспорт воситасини бошқаришни киритди.
“Биз бундай бузғунчи ва тартиббузарларни бир неча бор огоҳлантирганмиз. Бундан кейин улар билан гап қисқа бўлади. Агар қонунга ҳурмат қилмасанг — ё максимал муддат билан қамоққа тушасан, ёки шартнома имзолаб ”махсус ҳарбий операция” зонасига жўнайсан. Ўша ерда душманга ўз жасоратингни, довюраклигингни ва эпчиллигингни кўрсатасан”, деди Қодиров.
Чеченистон раҳбари бундай ёндашув ҳуқуқбузарларни маъмурий жавобгарликка тортишдан кўра мақсадга мувофиқроқ бўлишини айтди. У республикада 2,5 минг кишилик янги полкнинг шакллантирилишини ҳисобга олиб, буни “ўринли” деб атади. Шунингдек, у Давлат думаси депутати Адам Делимхоновга масалани назоратга олишни топширди.
Сентябрь ойи охирида Рамзан Қодиров республикада қўшимча захира бўлинмаларини ташкил этиш имконияти кўриб чиқилаётганини маълум қилганди. У бу борада “жойлардаги масъулларга” топшириқлар берилганини айтган.
Изоҳ (0)