Кеча, 28 март куни Мьянмада юз берган зилзила қурбонлари мингдан ортди. Бу сўнгги йиллардаги энг ҳалокатли табиий офат ҳисобланади. Ҳарбийлар назоратидаги ҳукумат хорижлик қутқарувчилар учун мамлакатга киришга рухсат берди.
7,7 магнитудали зилзила усиз ҳам фуқаролар уруши домида қолган мамлакатда кўприклар, аэропортлар ва бошқа инфратузилмага жиддий зарар етказди. Сейсмологларга кўра, бу 1946 йилдан бери мамлакатда содир бўлган энг кучли зилзила ҳисобланади. Унинг эпицентри Мьянманинг иккинчи йирик шаҳри Мандалай ғарбида бўлган. Силкиниш тўлқинлари пойтахт Нейпидо ва бошқа йирик шаҳарларда ҳам сезилган.
Аввалига 144 киши ҳалок бўлгани ҳақида хабар қилинганди. Бироқ ҳокимиятни тўнтариш йўли билан ўз қўлига олган Мин Аун Хлайн Мандалайга келгач, қурбонлар сони кескин ошгани маълум қилинди. Қутқарув техникаларининг етишмаслиги сабаб вайроналар остидаги одамларни қўл билан қазиб чиқаришга тўғри келмоқда. Шу боис ҳарбий хунта фавқулодда ҳолат эълон қилиб, халқаро ҳамжамиятдан ёрдам сўради.
Табиий офат натижасида Мандалай ва Нейпидо халқаро аэропортлари жиддий зарар кўрган. Нейпидода диспетчерлик минораси қулаб тушиб, камида етти киши, жумладан, диспетчер, унинг ёрдамчилари ва ҳарбий разведка офицерини ҳаётдан олиб кетган.
Зилзила таъсири қўшни мамлакатларда ҳам сезилди. Таиланд пойтахти Бангкокда қурилиши тугалланмаган 30 қаватли бино қулаб тушган. Ҳозиргача 10 киши ҳалок бўлгани, 16 киши жароҳатлангани ва 101 киши бедарак йўқолгани хабар қилинмоқда.
Ҳалокатнинг кўлами ва прогнозлар
АҚШ Геологик хизмати (USGS) ҳисоб-китобларига кўра, Мьянмада қурбонлар сони 10 000 нафардан ошиши, йўқотишлар эса мамлакатнинг йиллик иқтисодий ишлаб чиқариш ҳажмидан кўпроқ бўлиши мумкин.
Мьянма мухолифати — ҳарбий тўнтаришдан сўнг тузилган Миллий бирлик ҳукуматининг маълум қилишича, зилзила оқибатида камида 2 900 та бино, 30 та йўл ва 7 та кўприк зарар кўрган.
Мьянма армияси 2021 йилда давлат тўнтаришини амалга оширганидан сўнг, мамлакатда фуқаролар уруши бошланди ва ҳануз давом этмоқда.
Изоҳ (0)