Гавайи архипелагининг Мауи ва Катта оролларида йирик ўрмон ёнғинлари билан боғлиқ вазият аста-секин барқарорлашмоқда: табиий ёнғин марказларининг аксарияти ўраб олинди ва тарқалиши назорат қилинмоқда. Бу ҳақда АҚШнинг Гавайи штати расмийлари ёнғинларга қарши курашда муваффақиятга эришилганини таъкидлаб, маълум қилди.
Мауи ғарбидаги Лахайна шаҳри атрофида кузатилаётган, айниқса, кучли ёнғин ҳозирда 90 фоизга ўраб олинган, ичкаридаги Кула шаҳри яқинида эса ёнғин тўлиқ ўчирилган.
14 август куни эрталабки ҳолатга кўра, 8 августдан бери оролларни қамраб олган ёнғин қурбонлари 96 нафарга етгани тасдиқланган. 2 200 дан ортиқ бино вайрон бўлган, уларнинг деярли 90 фоизи турар жой иншоотлари. Ёнғин оқибатида 850 гектардан ортиқ майдон ёниб кетган. АҚШ матбуотига кўра, бу ёнғинлар сўнгги 100 йил ичида АҚШ тарихидаги энг даҳшатли табиий офатга айланди. Фавқулодда вазиятларни бошқариш бўйича федерал агентлик (FEMA) дастлабки ҳисоб-китобларига кўра, биргина Лахайнани қайта тиклаш 5,5 миллиард долларга тушади.
Гавайидаги ёнғинлар: шок ва йўқотишлар
FEMA 12 август куни маълум қилишича, ҳозирда ўнга яқин федерал агентликлар ёнғиндан жабрланганларга ёрдам бериш устида ишламоқда. 150 киши, жумладан, қидирув-қутқарув гуруҳлари аллақачон Мауида ва яна кўплари йўлда, дея қўшимча қилди агентлик.
“Биз шок ва йўқотиш ҳолатидамиз”, — деди якшанба куни CNN телеканалида Гавайи штатидан сенатор Мази Хироно. Гавайи губернатори Жош Грин расмийлар ёнғин хавфи ҳақида одамлар кеч хабардор қилингани масаласида биргаликда текширув ўтказишини маълум қилди. Reuters хабарига кўра, тревога сигналини берувчи сиреналар ишламаган.
Ёнғинларнинг аниқ сабаблари ҳалигача номаълум
Гавайи расмийларига кўра, ёнғинлар архипелагдан жанубга қараб ҳаракатланаётган “Дора” тўфони билан боғлиқ бўлиши мумкин. Тезлиги 130 километр/соатга етган кучли шамол таъсирида аланга тезда қуруқ ўт ва биноларга тарқалган. Бироқ ёнғинларнинг аниқ сабаблари ҳозиргача аниқлангани йўқ.
Қутқарув ишларини Лахайна шаҳрининг шимолий ва жанубий қисмларига фақат катта кириш йўли орқали бориш мумкинлиги ҳам қийинлаштирган. Маҳаллий энергетика компанияси ҳам электр таъминотини ўз вақтида ўчирмаган. Юқори волтли симларнинг қулаши эса янги ёнғинларни келтириб чиқарган бўлиши мумкин.
Изоҳ (0)