Ўзбекистонда тўйлар ХIX аср тафаккури билан ўтказилмоқда. Бу ҳақда тарихчи олим Бахтиёр Холмуродов YouTube’даги чиқишида фикр билдирди.
“Қурултой” подкастида ўзбеклар тўйи билан боғлиқ ижтимоий муаммолар таҳлил қилинди. Бахтиёр Холмуродовнинг айтишича, тўйларга харажатни камайтириб, таълимга пул сарфлаш вақти аллақачон келган.
“2014 йилда Фуқаролик жамиятини мониторинг қилиш институти бўларди. Ўшанда устозим Бахтиёр ака Исоқовдан маълумот олгандим. У киши бир рақамни айтгандилар. Бу ҳаммамизни огоҳликка чорлаши, ўйлантиришдан ташқари ташвишлантириши ҳам керак. Ўша йили Тожикистоннинг ялпи ички маҳсулоти тахминан 10 миллиард доллар атрофида бўлган. Ўзбекистон халқи худди шу йили тўйларга 7,5 миллиард долларни сарфлаб юборган. Бу 2014 йилдаги маълумот. 2024 йилдаги маълумотни ҳам устозимдан олдим. Тўй харажатлари салкам 12 миллиард долларга қараб кетган. Яъни жуда катта рақамлар. Бунинг тагида инсон тақдири ётипти. Тўйдан иқтисод қилинган пулларни таълимга сарфлаш, бунга жиддий қараш фурсати келди. Сабаби XXI асрда XVI ёки ХIX аср тафаккури билан яшаб бўлмайди. Алихонтўра Соғунийнинг: ъАгар ўзбеклар ҳар қандай ишга эрталаб ошга боргандек бирлашганда эди, булардан буюк миллат бўлмасдиъ, деган фикрлари бор эди. Бунинг тагида жуда катта маъно мужассам”, деди мутахассис.
Аввалроқ “Америка овози” телерадиоси журналисти Навбаҳор Имомова Америкадаги ўзбекистонликларда ҳам пулни аямаслик, керакcиз нарсаларга сарфлаш одати борлигини айтганди.
Изоҳ (0)