Сербиянинг Ниш шаҳрида бокс бўйича аёллар ўртасидаги жаҳон чемпионати ўз якунига етди. Унда Ўзбекистон терма жамоаси муваффақиятли иштирок этиб, ўз тарихида илк бор 1 та кумуш ва 3 та бронза медалларига сазовор бўлди. Бу ҳақда Миллий Олимпия қўмитаси матбуот хизмати хабар берди.
8—17 март кунлари Сербиянинг Ниш шаҳрида бўлиб ўтган жаҳон чемпионатида Ўзбекистон шарафини 12 нафар боксчи қизлар ҳимоя қилди. 48 кг вазн тоифасида Фарзона Фозилова, 50 кг вазн тоифасида Сабина Бобоқулова ва 52 кг вазн тоифасида Феруза Казакова мусобақа бронза медалларига эга чиқди.
-66 кг вазн тоифасида рингга кўтарилган Навбаҳор Ҳамидова иккинчи ўринни эгаллаб, кумуш медални қўлга киритди. Ўзбекистонлик боксчи финал жангида Олимпиада ва жаҳон чемпиони, туркиялик Бусеназ Сурменлига имкониятни бой берди. Шундай бўлса-да, у катталар ўртасидаги дунё биринчиликларининг финалида рингга кўтарилган биринчи ўзбекистонлик боксчи қизга айланди.
Мусобақада медаллар қўлга киритган спортчилар:
Кумуш медал:
-66 кг: Навбаҳор Ҳамидова
Бронза медал:
-48 кг: Фарзона Фозилова
-50 кг: Сабина Бобоқулова
-52 кг: Феруза Казакова
Изоҳ (0)