Президентнинг “Орол маданият саммитини юқори савияда ўтказиш тўғрисида”ги қарори қабул қилинди. Бу ҳақда ЎзА хабар берди.
Қарор билан, 2025 йилдан бошлаб ҳар ўн саккиз ойда — баҳор ёки куз фаслларида Орол маданият саммити ўтказиб борилади.
Биринчи Орол маданият саммити Самарқанд иқлим форуми билан уйғун ҳолда 2025 йил 4—6 апрель кунлари Самарқанд ва Нукус шаҳарларида ташкил этилади.
Саммитнинг асосий мақсад ва йўналишлари сифатида Оролбўйида ва дунёнинг бошқа минтақаларида юзага келган экологик муаммоларни муҳокама қилиш ҳамда оқилона ечимларни тақдим этиш учун глобал платформа яратиш белгиланди. Шу билан бирга:
- Оролбўйи муаммоларини ҳал этишда фанлараро ёндашувни ривожлантириш;
- барқарор ечимлар ва стратегиялар яратишга қаратилган таълим дастури асосида Орол мактабини ташкил этиш;
- замонавий технологиялар ва анъанавий меъморчилик асосида “Истиқлол” маданият ва истироҳат боғи, боғ ҳудудида жойлашган болалар кутубхонасини қайта барпо этиш ҳамда улардан самарали фойдаланишни йўлга қўйиш;
- етакчи маҳаллий ва хорижий мутахассислар ҳамда ташкилотлар билан ҳамкорликда Оролбўйи минтақасида сув ва тупроқ тадқиқотлари олиб бориш;
- Оролбўйи ҳудудининг тупроқ ва иқлим шароитига мос бўлган қишлоқ хўжалиги экинларини ўрганишга ихтисослашган лаборатория платформасини яратиш ҳамда уни мазкур йўналишда амалга ошириладиган илмий тадқиқотларнинг ўқув-амалиёт майдонига айлантириш;
- Оролбўйи минтақасида асрлар давомида шаклланган ноёб маданият ва анъаналарни сақлаш, ҳимоя қилиш ва кенг оммалаштириш;
- халқаро миқёсда доимий мулоқотлар, амалиётлар, семинарлар, тадқиқот дастурларини ташкил этиш.
Изоҳ (0)