Дунёнинг 100 дан ортиқ етакчилари 2030 йилга бориб ўрмонларнинг йўқолиб кетиши жараёнини тўхтатишга келишиб олди. Бу Глазгода ўтказилаётган иқлим бўйича саммит доирасидаги биринчи энг йирик келишувга айланди, деб хабар беради «Интерфакс».
Ушбу қарорни қўллаб-қувватлаганлар орасида Бразилия, Россия, Канада, Колумбия, АҚШ, Буюк Британия ва Индонезия ҳам бор. Таъкидланишича, ушбу мамлакатлар ҳисобига дунёдаги ўрмонларнинг қарийб 85 фоизи тўғри келади.
Келишувга кўра, 20 миллиард доллар ажратилади, унинг бир қисми ўрмон ёнғинлари оқибатида жабр кўрган ҳудудларни қайта тиклаш ва ўрмон ёнғинларига қарши курашишга сарфланади. Шунингдек, 28 мамлакатнинг ҳукумати қишлоқ хўжалиги маҳсулотлари, хусусан, палма ёғи, какао ва соя ишлаб чиқариш учун ўрмонларни кесишни тўхтатади.
Британия ОАВларининг маълумотларига кўра, Буюк Британия бош вазири Борис Жонсон 2 ноябрь куни ўтказиладиган йиғилишда дунёда ўрмонларнинг кесилиши муаммосини муҳокама қилиб, эришилган келишувни «ўрмонлар ҳимояси ва уни қайта тиклаш бўйича муҳим битим» деб атайди.
«Ушбу муҳим ва бой экотизимлар — табиий соборлар — бу сайёрамизнинг ўпкаси. Улар омон қолишимиз учун фавқулодда муҳим», — дейди Жонсон.
БМТнинг иқлим бўйича Глазгода 31 октябрь куни бошланган конференцияси 12 ноябрга қадар давом этади. Тадбирда қарийб 200 га яқин мамлакатдан вакиллар қатнашиши кутилмоқда.
Аввалроқ БМТнинг иқлим бўйича саммити бўлиб ўтадиган Глазго шаҳрини сув босгани, АҚШнинг Чикаго шаҳри иқлим ўзгариши туфайли йўқ бўлиб кетиш хавфи остида экани тўғрисида хабар берилганди.
Изоҳ (0)