Ўзбекистон БМТ шафелигида Орол денгизи ва Оролбўйи ҳудуди бўйича махсус Траст фонди тузилишини мақсадга мувофиқ деб билади. Бу ҳақда Ўзбекистон ташқи ишлар Вазири Абдулазиз Комилов Нью-Йоркда БМТнинг Барқарор ривожланиш бўйича саммитидаги чиқиши чоғида маълум қилди, дея хабар беради «Газета.uz».
Ўзбекистон таклифига кўра, Траст фондининг асосий вазифаси қуйидаги муҳим йўналишлардаги ҳаракатларни мувофиқлаштириш ҳамда манзилли дастурлар ва лойиҳаларни амалга оширишдан иборат бўлади:
- Оролбўйи ҳудудининг ижтимоий-иқтисодий ривожланиши учун таъсирчан чоралар тизимини шакллантириш, мазкур минтақада яшовчи аҳолининг муносиб турмуш тарзини таъминлаш учун керакли шароитлар яратиш, саломатлигини муҳофаза этиш ва генофондини асраш;
- Оролбўйидаги экологик мувозанатни асраш, чўллашишга қарши чоралар кўриш, сувдан оқилона фойдаланишни жорий этиш;
- айни пайтда йўқолиб кетиш арафасида турган ноёб флора ва фаунани сақлаб қолиш, ҳайвонот ва ўсимлик дунёсининг биохилма-хиллигини тиклаш;
- минтақанинг чекланган сув ресурслари, биринчи галда Амударё ва Сирдарёдан минтақадаги барча мамлакатлар манфаатлари ва халқаро ҳуқуқ нормаларига қатъий риоя этган ҳолда фойдаланиш.
Эслатиб ўтамиз, 2013 йили БМТ Бош Ассамблеясининг 68-сессиясида Ўзбекистон томонидан таклиф этилган «Орол қуриши оқибатларини бартараф этиш ва Оролбўйида экотизимлар ҳалокатининг олдини олиш бўйича чора-тадбирлар Дастури» расмий ҳужжат сифатида маъқуллаган эди.
Изоҳ (0)