Тинч океанида жойлашган орол-давлатлардан бири Тувалу ташқи ишлар вазири Саймон Кофе Бирлашган Миллатлар Ташкилотининг иқлим муаммолари бўйича конференциясидаги (COP26) нуқтини ўзгача — тиззасигача сувда турган ҳолатда сўзлади. Бу ҳақда Reuters хабар қилди.
Саймон Кофенинг костюм ва бўйинбоғ билан сув ичида тургани акс этган видеолавҳа ижтимоий тармоқларда кенг тарқалди. Бу орқали Тувалудаги денгиз сатҳининг кўтарилиши билан боғлиқ муаммога эътибор қаратилди.
«Тувалунинг адлия, алоқа ва ташқи ишлар вазири Саймон Кофе иқлим ўзгариши хавфидан огоҳлантиришнинг ҳеч кимникига ўхшамаган, таъсирли усулидан фойдаланди», — дейилади хабарда.
Кофенинг қайд этишича, мамлакат ҳозирда иқлим ўзгариши ва денгиз сатҳи кўтарилиши оқибатларига қарши курашиб келмоқда.
Видео Тувалу пойтахти Фунафути шаҳридаги ТVBC жамоат телерадиокомпанияси томонидан суратга олинган ва 9 ноябрь куни БМТ саммитида намойиш этиш учун тайёрланган.
Тувалу — Океанияда, Тинч океанининг жануби-ғарбий қисмида жойлашган давлат. Аҳолиси 11 206 кишини ташкил этади. Уларнинг кўпчилиги тувалулар. Расмий тил — инглиз тили, шунингдек, полинезия тилларидан бири — тувалулар тилида ҳам сўзлашилади.
Эслатиб ўтамиз, COP26 Буюк Британиянинг Глазго шаҳрида 31 октябрда бошланган ва 12 ноябргача давом этади. Унда 200 га яқин давлатдан вакиллар иштирок этиши кутилмоқда. Иқлим бўйича саммит доирасида дастлаб дунёнинг 100 дан ортиқ етакчилари 2030 йилга бориб ўрмонларнинг йўқолиб кетиши жараёнини тўхтатишга келишиб олди.
Аввалроқ БМТнинг иқлим саммитида 40 дан ортиқ давлат кўмирдан фойдаланишни камайтириш тўғрисида шартнома имзолагани хабар қилинганди. Шунингдек, Тожикистон президенти Эмомали Раҳмон БМТ саммитида мамлакатдаги иқлим ўзгариши муаммоларини санаб ўтганди. Саммит бошланишига уч кун қолганда эса Глазго шаҳрини сув босган.
Изоҳ (0)