Тошкент–Фукуок йўналишидаги 9С-1021 рейси 21 февраль куни соат 23:55 да жўнаши режалаштирилган эди, бироқ техник сабабларга кўра кечиктирилди. Бу ҳақда Air Samarkand хабар берди.
Қайд этилишича, учишни бошлаш вақтида экипаж шасси тебранишини сезиб, хавфсизлик қоидаларига мувофиқ, тўғри ва профессионал қарор қабул қилиб, парвозни тўхтатди. Самолёт терминалга қайтарилиб, муҳандислар томонидан батафсил текширувдан ўтказилди.
Текширув натижасида муайян деталларнинг алмаштирилиши зарур экани аниқланди ва ҳозирда ушбу ишлар амалга оширилмоқда. Носозлик бартараф этилгач, самолёт қўшимча текширувдан ўтказилади.
Авиация қоидаларига мувофиқ, йўловчилар меҳмонхонага жойлаштирилди. Тахминий жўнаш вақти – 22 февраль, соат 22:00 (маҳаллий вақт).
Фукуок бу Вьетнамнинг жанубидаги ғарбий қисмида жойлашган орол ва туман. Фукуок ороли Вьетнамнинг энг катта оролидир ва мамлакатнинг энг муҳим туристик марказларидан бири ҳисобланади.
Бундан аввал 2025 йил 28 январь куни Uzbekistan Airways’нинг HY101 рейси (Тошкент—Нью Йорк) Исландиянинг Кефлавик шаҳридаги захира аэродромига мажбурий қўнишни амалга оширган эди. Маълум қилинишича, бунга парвоз давомида йўловчилардан бирида туғуруқ бошлангани сабаб бўлган. Йўловчи ўғил фарзандини дунёга келтирган. Самолёт муваффақиятли қўнганидан сўнг, тиббиёт ходимлари бортга кўтарилиб, зарур ёрдам кўрсатган. Она ва чақалоқ маҳаллий клиникага етказилган.
Uzbekistan Airways матбуот хизмати компания самолётида 15 январь куни носозлик кузатилганини маълум қилганди. Қайд этилишича, Внуково халқаро аэропортида ҳаво кемасида техник носозлик вужудга келган. Шу сабабли Uzbekistan Airways авиакомпаниясининг бир нечта авиақатновлари мажбурий кечиктирилган. Бортида 132 йўловчи бўлган самолёт аэропортга қўнаётганда двигателлардан бири ишдан чиққан. Қўниш муваффақиятли амалга оширилган.
Шунингдек, 1 февраль куни Centrum Air авиакомпаниясининг C63336 рақамли рейсида Мадинадан Фарғонага учаётган A321neo самолёти Марида (Туркманистон) мажбурий қўнишни амалга оширган. 21 февраль куни Тошкентдан Жиддага учаётган самолёт фавқулодда Баҳрайнга қўнган.
Изоҳ (0)