Қрим ярим оролининг Россия томонидан аннексия қилиниши халқаро ҳуқуқнинг бузилиши ҳисобланади. Бу ҳақда Туркия ТИВнинг Россия томонидан Қрим аннексия қилинганининг 11 йиллиги муносабати билан берган баёнотида айтилади.
Ҳужжатда қайд этилишича, Анқара бу вазиятни номақбул деб ҳисоблайди ва Украинанинг ҳудудий яхлитлиги ва суверенитетини қўллаб-қувватлайди.
“Биз Қримдаги вазиятни, айниқса, ярим орол туб аҳолиси бўлган Қрим татар-туркларининг аҳволини диққат билан кузатишда давом этамиз ва бу масалани халқаро ҳамжамият кун тартибида ушлаб туришда давом этамиз”, дейилади баёнотда.
Эслатиб ўтамиз, Қрим яриморолининг Россия томонидан босиб олиниши 2014 йил 20 февралда қўшинларнинг киритилиши ва стратегик объектларнинг эгаллаб олиниши билан бошланган. 16 март куни Россия ҳарбийлари назорати остида “референдум” ўтказилди. Икки кундан сўнг Россия тегишли “ҳужжат”ни имзолаб, Қримнинг “қўшиб олиниши”ни эълон қилди. 27 март куни БМТ бош ассамблеяси Украинанинг ҳудудий яхлитлигини тасдиқловчи резолюцияни қабул қилди.
Изоҳ (0)