Prezidentning “Orol madaniyat sammitini yuqori saviyada o‘tkazish to‘g‘risida”gi qarori qabul qilindi. Bu haqda O‘zA xabar berdi.
Qaror bilan, 2025-yildan boshlab har o‘n sakkiz oyda — bahor yoki kuz fasllarida Orol madaniyat sammiti o‘tkazib boriladi.
Birinchi Orol madaniyat sammiti Samarqand iqlim forumi bilan uyg‘un holda 2025-yil 4—6-aprel kunlari Samarqand va Nukus shaharlarida tashkil etiladi.
Sammitning asosiy maqsad va yo‘nalishlari sifatida Orolbo‘yida va dunyoning boshqa mintaqalarida yuzaga kelgan ekologik muammolarni muhokama qilish hamda oqilona yechimlarni taqdim etish uchun global platforma yaratish belgilandi. Shu bilan birga:
- Orolbo‘yi muammolarini hal etishda fanlararo yondashuvni rivojlantirish;
- barqaror yechimlar va strategiyalar yaratishga qaratilgan taʼlim dasturi asosida Orol maktabini tashkil etish;
- zamonaviy texnologiyalar va anʼanaviy meʼmorchilik asosida “Istiqlol” madaniyat va istirohat bog‘i, bog‘ hududida joylashgan bolalar kutubxonasini qayta barpo etish hamda ulardan samarali foydalanishni yo‘lga qo‘yish;
- yetakchi mahalliy va xorijiy mutaxassislar hamda tashkilotlar bilan hamkorlikda Orolbo‘yi mintaqasida suv va tuproq tadqiqotlari olib borish;
- Orolbo‘yi hududining tuproq va iqlim sharoitiga mos bo‘lgan qishloq xo‘jaligi ekinlarini o‘rganishga ixtisoslashgan laboratoriya platformasini yaratish hamda uni mazkur yo‘nalishda amalga oshiriladigan ilmiy tadqiqotlarning o‘quv-amaliyot maydoniga aylantirish;
- Orolbo‘yi mintaqasida asrlar davomida shakllangan noyob madaniyat va anʼanalarni saqlash, himoya qilish va keng ommalashtirish;
- xalqaro miqyosda doimiy muloqotlar, amaliyotlar, seminarlar, tadqiqot dasturlarini tashkil etish.
Izoh (0)