ЎФА мажлислар залида Ўзбекистон U-23 жамоаси бош мураббийи Темур Кападзе иштирокида матбуот анжумани бўлиб ўтмоқда. Бош мураббий мусобагача бўлган тайёргарлик, Париждаги шароитлар ҳамда натижалар борасида фикр билдирмоқда.
Кападзе “Олимпик” лойиҳаси борасида тўхталди.
“3,5 йил олдин раҳбарият олдимизга юқори мақсадни қўйди. Бу давр мобайднида катта йўлни босиб ўтдик. Кўплаб ёшларга футболда ўз ўрнини топишига хизмат қилдик, “Олимпик”дан миллий жамоаларга чақирувлар олишди.
Бу жамоа илк мавсумданоқ нималарга қодирлигини кўрсата олди. Про Лигадан Суперлигага йўл олишни уддаланди ва жамоа шу даврга қадар стабил ўйин кўрсатиб келмоқда. Умуман олганда, 4 та йирик мусобақада иштирок этдик. Мухлисларимиз ишончини оқлашга ҳаракат қилдик. Худога шукур, юзимиз ёруғ бўлди. Энг асосий вазифа — Олимпиада йўлланмасини қўлга киритдик. Қолган турнирларда ҳам муносиб иштирок эта олдик, деб ўйлайман.
Бизни қўллаб-қувватлаган раҳбариятга, мухлисларимизга ва барчангизга раҳмат айтаман. Футболимизни янги босқичга олиб чиқиш йўлида бор имкониятимизни ишга солдик. Энди бу тарих”.
Бош мураббийнинг фикрича, тайёргарликка вақт етарли бўлмади. Баъзи футболчиларда чарчоқ сезилди.
“Олимпиадага келадиган бўлсак, Осиё кубогидан кейин олдимизда кўп вақт қолмаганди. Аввало Олимпиадага йўл олишдаги юк билан биз 3,5 йил ҳаракат қилдик, буни қувончи албатта бор эди.
Кўп легионерларимизда чемпионатлар тугаганди, кимдирлардадир чарчоқ сезилди, баъзилар жамоа алмаштирди. Балки олдимизда кўпроқ вақт бўлганда бошқача бўлармиди. Тайёргарликка келсак, айтганимдек, вақтимиз кўп эмасди. Таркиб шакллантиришда ўзига яраша қийинчиликлар бўлди. Dukeнтда ҳам легионерларсиз тайёргарлик кўришга тўғри келди.
Ёши катта футболчиларимизнинг иқтидори, кучини ҳаммамиз яхши биламиз. Футболчилар бундан кўпроғига қодир эдилар. Уларга миннатдорчилик билдираман. Улар учун ҳам, биз учун ҳам фойдали бўлди. Бу — жамоавий ўйин. Энг асосийси — биз барча учрашувда ғалаба қозонсак бўларди, қаердадир омад етишмади”.
Кападзенинг фикрича, Испания билан ўйинга қўйилган тактикалар ишлаган.
“Испаниянинг охирги ўйинларини таҳлил қилдик. Албатта ўзига яраша камчиликларимиз ҳам бўлди. Ўйинга қўйган стратегиямиз яхши ишлади, айниқса, биринчи бўлимда. Лекин иккинчи бўлимда Испанияга имконият бердик.
Уларга қарши тўғри прессинг қилиб, имкониятларга эга бўлдик. Бу ўйиндан кейин жамоа билан уларнинг ва ўзимизнинг ўйинимизни таҳлил қилдик. Биз ўша куни рақибдан кучсиз эмасдик, энг камида дуранг қайд этишимиз мумкин эди.
Умуман олганда, бундан кўпроғини кутгандик, бироқ бизга омад етишмади. Энг муҳими биз катта тажрибага эга бўлдик”.
Мураббий Миср билан ўйинда Жасур нега алмаштирилгани ҳақида тўхталди.
“Жасур ўша ўйинда чарчади. Шу сабабли алмаштирдик.
Биринчи ўйинда ҳам кўп куч йўқотдик. Рақиб қарши ҳужумларда бизга муаммо туғдирди. Улар зич ҳимояланди, лекин етарлича имкониятларимиз бўлди”.
Тақвим ҳам Ўзбекистон Олимпиячиларига бир оз ноқулайлик туғдирган.
“Илк учрашув кўп нарсага ойдинлик киритади. Биринчи ўйинда ютсангиз, кейинги ўйинларда босим бўлмайди. Бироқ тақвим бизга боғлиқ бўлмаган ҳолат эди. Рақибларимиз ҳам ўзига яраша кучли. Бу мусобақада кучсиз жамоа йўқ эди. Ўйинларда етарлича вазият яратдик. Қаердадир босим ҳалақит берди”.
Кападзе ҳеч қайси футболчига эътирози йўқлигини таъкидлади.
“Аввало Президентимизга, ЎФА раҳбариятига, мухлисларга миннатдорчилик билдириб қоламан. Сизлар билан барча ютуқларга эришдик, сизлар бизга мотивация бердингиз, қийин пайтларда қўллаб-қувватладингиз.
Мураббийлар штабига, ишчиларга, барча-барчага раҳмат айтаман, уларнинг ҳам натижаларда хиссаси бор.
Ҳеч бир футболчига эътирозим йўқ. Айтганимдек, биз бундан кўпроғида қодир эдик.
Ватан жамоасини севишда, қўллаб-қувватлашда чарчаманглар. Футболчиларимизни яхши кунида ҳам, қийин кунида ҳам ёнида бўлайлик. Улар ҳам бу масъулиятни ҳис қилиб майдонда бошқача ҳаракат қилишади.
Барчангизга раҳмат, соғ бўлинглар”, дея Кападзенинг сўзларини келтиради ЎФА матбуот хизмати.
Маълумот учун, Ўзбекистон Олимпия жамоаси Испания (2:1) ва Миср (1:0) терма жамоаларига мағлуб бўлди ҳамда Доминикан Республикаси билан (1:1) дуранг ўйнади. Жамоа C гуруҳида 4-ўринни эгаллади.
Изоҳ (0)