14 декабрга ўтар кечаси Россия қўшинлари Украинанинг Дунай дарёсидаги Измоил портига дронлар билан ҳужум қилди. Дронлардан камида биттаси НАТО давлати ҳисобланган Руминиянинг ҳаво ҳудудини бузди. Бу ҳақда НTV хабар берди.
Мазкур ҳодисага жавобан Германия ўзининг Eurofighter қирувчи самолётларини ҳавога кўтарди. Немис авиатехникаларини рус дронлари устидан визуал назоратни ўрнатди, аммо НАТО томонидан уларни уриб тушириш ҳақида буйруқ бўлмади.
Россия Қуролли кучлари 14 декабрга ўтар кечаси Украина бўйлаб жами 70 тагача Shahed 136 русумли дронларни учирди. Дастлабки маълумотларга кўра, улардан бири Руминия ҳаво ҳудудида портлаган.
Руминия Мудофаа вазирлиги Украина билан чегарадан 6,5 километр узоқликдаги Гринд қишлоғи яқинида 1,5 метр чуқурликда кратер ҳосил бўлганини маълум қилди. Буни Россия дрони ҳосил қилгани “эҳтимоли” мавжуд. Бухарест ҳам F-16 самолётларини кузатув учун осмонга кўтарди.
“Вазирлик Россиянинг Дунай дарёсидаги Украина портларидаги айрим объектлар ва фуқаролик инфратузилмаси элементларига ҳужумларини кескин қоралайди. Бу ҳужумлар асоссиз ва халқаро гуманитар қонунларга жиддий зиддир”, — дейилади Руминия баёнотида.
Изоҳ (0)