20 сентябрь куни Россия президенти Владимир Путиннинг Сочидаги қароргоҳидан 25 километр узоқликда Украина дрони қулаб тушди. Бу ҳақда “Агенство” хабар берди.
Дрон ҳужуми оқибатида Адлер шаҳридаги нефть базасида ёқилғи баки ёниб кетган. Краснодар ўлкаси губернатори Вениамин Кондратев ёнғин майдони 96 квадрат метрни ташкил этганини айтган. Ҳодиса оқибатида ҳеч ким жабрланмаган.
Расмийлар ёнғин сабабларини расман эълон қилмаган. Дрон ҳужуми ҳақида Россиянинг Baza, Shot ва Mash Telegram каналлари хабар берган, улар, шунингдек, дрон бўлаклари акс этган суратларини чоп этган.
Адлер Украина томонидан назорат қилинадиган энг яқин ҳудуддан тахминан 550 километр узоқликда жойлашган. Дронлар илгари ҳеч қачон Россиянинг Қора денгиз соҳилларига бунчалик узоқ учмаган.
Дрон ҳалокатга учраган жой президентнинг расмий қароргоҳи “Бочаров Ручей”дан тахминан 25 километр узоқликда жойлашган. Бундан ташқари, резиденсия нефть омборига қараганда Украинага яқинроқ жойлашган.
Изоҳ (0)