Украина ҳарбий ҳаво кучларига қарашли учувчисиз дронлар Россияга қарашли Белгород ва Курск вилоятларига ҳужум қилиши оқибатида 5 киши ҳалок бўлди. Бу ҳақда Reuters нашри хабар берди.
Манбада айтилишича, Украина Белгород ва Курск билан бир пайтда Россия назорати остидаги Донецкка ҳам ҳаво ҳужуми уюштирган. Ҳужумлар оқибатида жами 9 киши жароҳатланган.
Донецкка ҳужумни вилоят раҳбари Денис Пушилин расман тасдиқлаган. Донецк шаҳридаги ресторанга дронлар зарбаси оқибатида уч нафар тинч аҳоли вакили ҳалок бўлган, 8 киши жароҳатланган.
Белгород вилояти губернатори Вячеслав Гладков баёнотига кўра, Украина ҳарбий дрони Новостроевка-Первая аҳоли пунктида тўхтаб турган юк машинасига зарба берган. Ҳодиса оқибатида 1 киши ҳалок бўлиб яна бир нафар фуқаро жароҳатланган.
Курск вилояти раҳбари Роман Старовойт ҳам 11 май куни чегарага яқин Суджа шаҳрида дронлар ҳужуми кузатилганини билдирган. Ҳужум оқибатида бир нафар фуқаро яраланиб, касалхонада вафот этган.
Расмийлар, шунингдек, Луганск вилоятига ҳам ҳужум уюштирилганини билдирган. Ровеньки шаҳридаги ёқилғи омборига ракета ҳужуми сабаб йирик ёнғин келиб чиққан. Ёнғинда 4 киши ҳалок бўлган, 11 киши яраланган.
Изоҳ (0)