8 январга ўтар кечаси ва эрталаб Россия қўшинлари Украина ҳудудига йирик ракета зарбасини берди. Бутун мамлакат бўйлаб ҳаво ҳужуми ҳақида огоҳлантириш эълон қилинди. Украина Қуролли кучлари Ҳарбий ҳаво кучлари Россия томонидан “Кинжал” ракеталари учирилгани ҳақида хабар берди.
Украина оммавий ахборот воситалари Кривой Рог, Запорожье, Днепр, Хмелницкий ва Харьков вилоятида портлашлар содир бўлганини хабар қилди. Запорожьенинг айрим ҳудудларида электр энергияси узилган.
Россия қўшинлари Харьковга камида тўртта зарба берди, деди вилоят ҳарбий маъмурияти раҳбари Олег Синегубов. Корхона ва таълим муассасасига зарар етган, 53 ёшли фуқаро жароҳатланган. Чугуэвский туманида хусусий уйга зарба берилди. 90 ва 60 ёшли эркаклар вайроналар остидан чиқарилди. Яна бир фуқаро вайроналар остида қолмоқда.
Запорожьеда 8 январь куни эрталаб бешта портлаш овози эшитилди, деди вилоят маъмурияти раҳбари Юрий Малашко. Унга кўра, шаҳар турли йўналишлардан қанотли ва баллистик ракеталар ҳужумига учраган.
“Ракеталар турар жой ҳудудлари – очиқ жойлар ва уйлар яқинига келиб тушган. Соат 08:00 ҳолатига кўра, ракета ҳужуми оқибатида икки киши — бир эркак ва аёл жабрланган”, — деди Малашко.
Украина жамоатчилиги ва ОАВ Кривой Рогдаги савдо маркази Россия ҳужуми туфайли жиддий зарар кўрганини хабар қилди. Днепропетровск вилояти расмийлари бу ҳақда ҳозирча изоҳ бермаган.
Украина жанубидаги мудофаа кучлари, шунингдек, тунда Россиядан саккизта Shahed-136/131 дрони учиб келганини хабар қилди. Таъкидланишича, барча дронлар уриб туширилган: еттитаси Одесса вилоятида, биттаси Николаевда.
Уриб туширилган дронлардан бирининг қолдиқлари Одесса вилоятидаги очиқ ҳудудга тушган. У ерда ёнғин чиқиб, қисқа вақтда ўчирилган. Вайронагарчилик ва қурбонлар йўқ, деб хабар берди Украина жануби мудофаа кучлари матбуот хизмати.
Изоҳ (0)