Америкалик актриса Бренда Сонг Женнифер Ҳадсон шоусида ўзининг турмуш ўртоғи, “Уйда ёлғиз” фильми юлдузи Маколей Калкиннинг машина ҳайдай олмаслиги ва яқин кунларгача кир ювишни билмаганлиги ҳақида сўзлаб берди. Эслатиб ўтамиз, актёр ҳозирда 44 ёшда.
“Мен ҳар доим буни таъкидлаганман: Мак ҳеч кимга ўхшамайдиган одам. У болалигиданоқ дунёдаги энг машҳур актёр бўлганига қарамай, кўпинча меҳмонхоналарда яшаган ва шу тарзда катта бўлган. У ҳеч қачон кир ювиш каби ишлар билан шуғулланмаган. Аввалига мен буни билганимда жуда ҳайратда эдим”, дея тан олди Сонг.
Унинг қўшимча қилишича, Маколей Калкин ҳеч қачон автомобиль ҳайдамаган ва ҳайдашни ўрганмаган ҳам. Кунларнинг бирида Сонг қаллиғини шаҳар кўчалари бўйлаб сайр қилишга таклиф қилган ва актёрдан умрида ҳеч қачон машина ҳайдамаганини эшитиб, даҳшатга тушган. Сонгнинг сўзларига кўра, у Калкинга автоулов минишни ўргатишга уринган, аммо бунинг уддасидан чиқа олмаган. Бренда бунинг учун алоҳида одам ёллашни режалаштирмоқда.
Маколей Калкин ва Бренда Сонг 2017 йилда танишган. 2022 йилда улар турмуш қурган. Эр-хотиннинг икки нафар фарзанди бор.
Аввалроқ Маколей Калкин укаси “Оскар”ни қўлга киритганида таъсирланиб, кўз ёшларини тия олмаган эди. Калкин тақдимот маросимини бошдан охиригача тўлиқ кўрмагани, фақатгина укасининг номзоди қўйилган номинация қисмини томоша қилгани ҳақида сўзлаб берган.
Изоҳ (0)