“Аср тўйи” бўлиши кутилаётган ҳиндистонлик миллиардернинг соҳибжамол рафиқаси — Радҳика Мерчант ҳақида нималар маълум?

Радҳика Мерчант — фармацевтика “қироли” Вирен Мерчантнинг соҳибжамол қизи ва катта санъат ишқибози. Тез орада у Ҳиндистоннинг энг бой одамлари оиласига келин бўлади.

Бўлажак қайнотаси Мерчантнинг Анант Амбани билан бўладиган тўйига шунчалик кўп пул сарфладики, у Осиёнинг энг бой одами унвонидан маҳрум бўлиб, биринчиликни Гаутам Аданига бой берди.

Бугун бутун дунё бу оиланинг тўй олдидан ўтказаётган тантаналари ва либосларини муҳокама қилмоқда, одамлар эса тўйни интиқлик билан кутмоқда. Куёвнинг семизлиги ҳамда “Соҳибжамол ва махлуқ” деган ҳақоратли сўзлар билан одамларнинг масхара қилишларини қиз парвойига ҳам келтирмайди. У Анантни қандай бўлса, шундайлигича севади.

Радҳика Мерчант 1994 йил 18 декабрда ишбилармонлар оиласида туғилган. Унинг ота-онаси миллиардерлар Вирен ва Шейла Мерчант — дунё миқёсида таблетка ҳамда капсулалар ишлаб чиқарувчи Encore Healthcare компаниясининг асосчиларидир. Бугунги кунда бу соғлиқни сақлаш соҳасидаги бутун бир экотизим бўлиб, у ҳар бир кишига тўлиқ тиббий хизматларни тақдим этади.

Мерчантлар оиласи ҳеч қачон бойлиги билан мақтанмаган. Айтиш жоизки, 2017 йилгача одамлар Радҳиканинг кимлигини ҳам билмас эди. У опаси Анжали билан учта элита мактабида ўқиган ва кейинчалик Нью Ёрк университетининг Сиёсатшунослик ва иқтисод факультетини тамомлаган.

Унинг опаси соч парвариш қилиш клублари тармоғининг ҳаммуассиси, шунингдек, ўзларига тегишли бўлган оилавий компания директори. Радҳика хорижда стажировкадан сўнг оилавий бизнесга маркетинг бўйича директор сифатида қўшилади. Бир нечта манбаларда Анант Амбани билан болалигидан танишлиги ҳақида маълумот берилган, аммо бу ҳақиқат эмас.

Мутахассисларнинг таъкидлашича, Амбанилар барча фарзандлари биринчи муҳаббати билан турмуш қурган оиланинг идеал қиёфасини яратиш учун қўлларидан келганча ҳаракат қилмоқда. Аслида, бундай никоҳ фақат катта ўғли Акаш ва Шлока Меҳтага насиб қилган. Амбаниларнинг ягона қизи Иша эса синфдошини жуда яхши кўрарди, лекин ота-онаси уларнинг бирга бўлишига рухсат бермайди ва қизига бошқа куёв топишади.

Кенжа ўғлига ҳам келинни ўзлари топган — улар гўзал Радҳикани танлашади. Кўплаб бой ва машҳур оилаларнинг меросхўрларидан фарқли ўлароқ, у Дҳирубҳай Амбани халқаро мактабида ўқимаган ва умуман ёпиқ турмуш тарзини олиб борган.

Қиз ёшлик даврларида ҳам тенгдошлари билан яқин бўлмаган, зиёфатларга бормаган. Анант билан ҳам фақат 2017 йилда ота-онаси орқали танишган.

Қиз 8 йил давомида бҳаратанатям услубида профессионал тарзда рақсга тушишни ўрганади ва ёшлигида ўзи ҳам классик раққоса бўлган бўлажак қайнонаси —Нита Амбанининг қалбини забт этади. Нита бўлажак келинини яхши кўради ва ҳозирдан Радҳикани ўзи бошқараётган барча ижтимоий лойиҳаларини давом эттиришга тайёрламоқда.

Кичик ўғлига Reliance Industries оилавий компаниясининг энергия йўналишини ишониб топширган Мукеш Амбани уни уйлантириш вақти келди, деб қарор қилади. Анантнинг ўзи India Today нашрига берган интервьюсида ҳеч қачон оила қуриш ҳақида ўйламаганини очиқ тан олади.

“Болалигимдан мен ҳеч қачон уйланмайман, деб ўйлардим, чунки доимо ҳайвонларга ғамхўрлик қилишни яхши кўрганман ва бутун ҳаётимни уларга бағишлашни хоҳлардим. Аммо Радҳика билан учрашганимдан сўнг, омадим борлигини англадим. У орзумдаги қиз эди — гўзал, меҳрибон, ҳайвонларни ҳам яхши кўради. Соғлиғим билан боғлиқ муаммоларга дуч келганимда у доим ёнимда бўлди. Радҳика менинг кучим ва таянчимдир”.

Дўстларининг айтишича, Радҳиканинг Анантдан олдин йигити бўлган, лекин Радҳика Анантнинг биринчи ва ягона муҳаббати ҳисобланади. 2018 йилда жуфтликнинг бир хил рангда кийинган сурати ижтимоий тармоқларда тарқалиб, ўзаро муносабатлари ҳақидаги миш-мишларни келтириб чиқаради.

Бироқ ёшлар ёки уларнинг оилалари томонидан бу хабар тасдиқланмайди. Кейинчалик қиз Анантнинг опаси ва акасининг тўйларида, шунингдек, Амбанининг барча тўй базмларида кўриниш беради, аммо расмий тасдиқ фақат 2022 йил декабрь ойида, ёшлар унаштирилганда пайдо бўлади.

Улар бир ярим йил олдин унаштирилган, шунда ҳам бир эмас, балки икки марта. Биринчи унаштирув 2022 йилда ўзаро оилавий бўлиб ўтган, иккинчиси 2023 йил январида бўлди. Унда Болливуд машҳурларининг ярми қатнашган. Бир йил ўтгач, Амбани иккита тўёлди базми уюштирди, бу билан ҳаммани ҳайратда қолдирди.

Амбанилар оиласи март ойида унаштирув маросмини Жамнагарда уч кун нишонлашди. Тадбирда бутун дунёдан 1500 нафар нуфузли кишилар: бизнесменлар, спортчилар, қўшиқчилар ва Болливуднинг машҳур шахслари иштирок этди.

Май ойида эса 800 нафар меҳмон ва 600 нафар экипаж аъзоси тўй олдидан иккинчи тантана учун ҳашаматли круиз кемасида тўпланишди. Ўрта Ер денгизи круизи меҳмонларни Палермодан тортиб Рим, Портофино ва Каннгача етказиш учун жўнади.

Тўй июль ойида бўлиши кутилмоқда ва бу йилнинг энг ҳашаматли тадбири бўлади. Бу тўй аллақачон “Аср тўйи” деб номланмоқда.